Այս օրերին լրանում է Սիվիլիթասի գործունեության հնգամյակը:

Իհարկե, Սիվիլիթասն իր ամենաուրախ օրերը չէ, որ ապրում է: Սա այն դասական դեպքերից է, որի առնչությամբ Չերնոմիրդինի հայտնի ասույթն առավել քան արդիական է` ուզում էին լավ, ստացվեց` «Կալաշնիկով»: Մենք, իհարկե, նրա երկու ասույթները միակցեցինք. «Ինչ անում ենք, ստացվում է կամ ԽՍՀՄ, կամ` Կալաշնիկով»:

Կոնկրետ դեպքում Սիվելնեթից իշխանությունները փորձեցին ԽՍՀՄ «պատրաստել»: Երևի ելնելով այն մտահոգությունից, որ ճյուղավորվող, լրատվական, քաղաքացիական սեկտորը լրջորեն զբաղեցնելու հայտ ներկայացրած կազմակերպությունը հնարավոր է և անկանխատեսելի վարքականոն դրսևորի սպասվող նախագահական ընտրությունների նախաշեմին, շեմին և հետնաշեմին. մանկանը խեղդեցին հենց օրորոցում, նրա այևս նախկին ղեկավարի դեմ հարուցելով հայտնի` «փողերի լավացման» գործը, զրկելով վերջինիս պատգամավորական անձեռնմխելիությունից, անհրաժեշտ պարտիայի դեպքում` նախագահի թեկնածու առաջադրվելու հեռանկարից, հասկացնելով նրա համակիրներին,  թե այստեղ, թե դրսում, որ «իրենց խաղը չարժե մոմին»:

Ի դեպ, որոշ չար լեզուներ ասում են նաև, որ իշխանությունները պատրաստ էին էլ ավելի հեռուն գնալ, շարժելով որոշ անշարժ անուններ` կապված Սիվիլնեթի հետ հայոց իշխանություններից Ռոբերտ Քոչարյանին առնչվող, բայց, քանի որ Վարդան Օսկանյանն այլևս որևէ վտանգ չէր ներկայացնում, մնացյալ «ներկայացումներն» էլ հետայդու դադարեցվեցին:

Բանն այն է, որ թե Օսկանյանի աշխուժացումը, թե ԲՀԿ-ում նրա «տեղավորվելը», թե նախագահական ընտրություններում թեկնածու դառնալու սպասվելիք պասաժն ամենևին ԲՀԿ-ի «նապարնիկ» Ռուսաստանի սրտով չէին: Դրա համար էլ Գորիկ  Գուրգենիչը զայրացել էր այդքան:

Խնդիրը նաև մորմոնական ֆինանսների, մորմոն Միթ Ռոմնիի բարձրաձայնումներն էին` Ռուսաստանի մասով:

Ավելին, Օսկանյանն ու իր թիկունքում կանգած հայաստանյան «մենեջերները» սխալ հաշվարկ էին թույլ տվել թե գեոքաղաքական, թե ներքաղաքական առումով, այդ էր պատճառը, որ «դառը դատեցին` դատարկ նստեցին»:

Ընդ որում, այս ամենում ամենահետաքրքիրն այն էր, որ այն, ինչ արվեց Օսկանյանի նկատմամբ իշխանությունների կողմից, շարժել էր Օսկանյանի զարմանքը:

Նա, թերևս, մտածել էր, որ նույն միջազգային հանրությունն իրեն միայնակ չի թողնի հայոց իշխանությունների դեմ հանդիման:

Նա, թերևս, մտածել էր նաև, որ Քոչարյանն այնքան ուժեղ է, որ կհաջողի ներքաղաքական սկսված պարտիայում, զի այնքան ազդեցիկ է, որ Ռուսաստանը չի ջղաձգվի ռուսամետ համարում ունեցող ԲՀԿ-ում` ամերիկյան որոշակի փաթեթ տեղակայելու առնչությամբ:

Ինչևէ. Սիվիլիթասն այսօր իր լավ օրերը չի ապրում, այնուհանդերձ, ամեն բան դեռ առջևում է, մաղթենք նրան լիքը հնգամյակներ:

Վահե Հովսեփյան