Այսօր հրավիրված մամուլի ասուլիսին Նժդեհի ստեղծած կառավարության արդարադատության նախարար Հովհաննես Դևեճյանի դերակատար Վիգեն Ստեփանյանը նախ քար գցեց Աշոտյանի բոստանը. «Ծաղրանքի է արժանի այն, որ մի ամբողջ սերունդ անգրագետ է մեծանում և չի ճանաչում իր մեծերին»: Իսկ Գարեգին Նժդեհի դերակատար Արտաշես Ալեքսանյանը պարծեցավ, թե՝«Գարեգին Նժդեհ» ֆիլմը դիտելուց հետո այն գերազանց է գնահատել ՀՀ նախագահ Սերժ Սարգսյանը:  (Ֆիլմի երկու՝ փակ և բաց, պրեմիերաները տեղի են ունեցել հունվարի 27-ին և 28-ին):

Չնայած տարաբնույթ կարծիքներին, դերակատարներն ասացին, որ ֆիլմի երկու ցուցադրություններից հետո հանդիսատեսի հոտնկայս ծափահարությունները խոսում են նրանց ստացած լավ տպավորությունների մասին:

«Գարեգին Նժդեհ» ֆիլմը, որի ռեժիսորը Հրաչ Քեշիշյանն է, մինչև դիտումը, սոցցանցերում քննադատության էր արժանացել ֆիլմի գլխավոր դերակատար Արտաշես Ալեքսանյանը. «Այս երկրագնդի վրա իդեալական բան չկա: Ստացվել է այն, ինչին մենք նպատակ ենք դրել ու ուզեցել ենք հասնել: «Я Гарегин Нжде» այդ խոսքի հիման վրա մենք տեսել ենք մեր աշխատանքի արդյունքը, երբ ես դուրս եկա ու տեսա, որ տղաները ձնագնդի են խաղում ու նույն բառերն արտաբերում, մեծ ոգևորություն ապրեցի»,- ասաց նա, զուտ հայկական սովորություն համարելով՝ չտեսած բանը քննադատելը:

Վիգեն Ստեփանյանն ասաց, որ համակարծիք է՝« Ցանկացած մարդ պետք է քննադատի միայն իր տեսածը: Ինձ համար ցավալին այն է, որ մենք ունենք քաղաքային մի շերտ, որ ամեն ինչի նայում է ծաղրելով։ Ինչքա՞ն կարելի է մերը նվաստացնել, չհարգել, եթե վաղը Կոմիտասի մասին ֆիլմ նկարվի, կրկին ծաղրանքի կարժանանա»:

Արտաշես Ալեքսանյանը համոզված էր, որ քննադատողները դրա համար աշխատավարձ են ստանում, իսկ միգո՞ւցե ծափ տվողներն էլ են աշխատավարձով ծափ տալիս:

Ինչևէ, դերասանը գտնում  է. «Ես չեմ ասում չքննադատեն, դա էլ իրենց գործն է: Եթե չանեն աշխատավարձ չեն ստանա: Մենք մերը կանենք, իրենք՝ իրենցը»: