2009-ի փետրվարի 3-ին, փոխոստիկանապետ Գևորգ Մհերյանի սպանությունից հետո, երբ քրեական գործի նախաքննությունը հանձնարարված է եղել ՀՀ հատուկ քննչական ծառայությանը (ՀՔԾ), ՔԿՀ-ներից մեկում գաղտնի տեսաձայնագրություն է կատարվել:  Այնուհետև, երբ քրեական գործի վարույթը կասեցվել է և սպանվածի հոր բողոքներից հետո` 2011-ի փետրվարին ուղարկվել ՀՀ ոստիկանության ՔԳՎ ՀԿԳ քննչական վարչություն` նախաքննությունը շարունակելու, ի հայտ է եկել նաև այս գաղտնի ձայնագրությունը և ուղարկվել փորձաքննության:

Պարզվել է, որ այն Գրիգոր և Խորեն Իգիթյանների (նրանց մասին` քիչ հետո)  նկատմամբ օպերատիվ ճանապարհով իրականացված տեսաձայնագրության լազերային սկավառակն է:

Դրա մեջ լսվող խոսակցության վերծանման մեջ թեև նշված է Գրիգորի և Խորենի անունը, սակայն այդ խոսակցությանը հետո խառնվել են 3-րդ (փաստաբանը), 4-րդ (գեներալ) անձինք: Վերջինը խոսում է «սարքել, կպցնելու» մասին (հավանաբար խարդախության և սպանության գործը), թողնում, որ երկու եղբայրները որոշեն, թե նրանցից ով է այդ գործով  «գնալու» (դատվելու), և ասում, որ իրենց հիմնական գործը փոխոստիկանապետի սպանության բացահայտումն է և այլն:

Ներկայացնում ենք մասնակի կրճատումներով` միայն առավել ուշագրավ հատվածները:

Ուրեմն տեսաձայնագրությունը կատարվել է քրեակատորղական հիմնարկներից մեկում, որտեղ այդ ժամանակ գտնվելիս է եղել Քերոլայն և Ջորջ Նաջարյանների գույքին խարդախությամբ տիրանալու համար դատապարտված Գրիգոր Իգիթյանը: Որոշակի ճնշումների ներքո նրան փորձել են նաև եղբոր` Խորեն Իգիթյանի միջոցով համոզել` Գևորգ Մհերյանի սպանությունը վերցնել իր վրա, կամ միասին որոշել, թե իրենցից ով է դատվելու այդ գործով: Նրանց միջև խոսակցությունն ընթացել է այն բանից հետո, երբ մամուլում նոր էր շրջանառության մեջ հայտնվել կամ հայտնվելու նրանց անունը` որպես  «վրեժխնդրության» հողի վրա կատարված սպանություն (իբր Գևորգ Մհերյանին սպանել էին խարդախության վերաբերյալ դատական գործին միջամտելու և դատավճիռը հօգուտ Նաջարյանների կայացնելու, անշարժ գույքը նրանց վերադարձնելու համար):

Մինչ եղբայրների խոսակցությունը, Գրիգորը կալանավայրում անկոչ այցելու է ունեցել (դեռ հայտնի չէ` ով է եղել, սակայն պարզ է, որ ՔԿՀ մտնելու «նարուշիլովկա» ունեցող մեկն է եղել). նրան իջեցրել են` այդ անձին հանդիպելու, որից հետո` հաջորդ օրը կամ գուցե օրեր անց Խորենը հետաքրքրվել է եղբորից` նրանց միջև տեղի ունեցած խոսակցության բովանդակության և այցի նպատակի մասին: Սակայն խոսակցության սկզբում Խորենը Գրիգորին հայտնել է, որ մինչ այդ ինչ-որ անձինք ձայնագրել են վերջինիս` սպանության վերաբերյալ «կամեռներում», ինչպես նաև Սուսիկի (Գրիգորի կնոջ) հետ ունեցած խոսակցությունները, որոնք նաև իրեն են տվել` լսելու:

Ինչին ի պատասխան Գրիգորն ասել է.

Գրիգոր- Սպանության հետ կապված ես ոչինչ չեմ խոսացել:

Խորեն — Սպանության հետ կապված չես ասե՞լ, որ ըըը ես ըլնեի, ես է կսպանեի:

Գրիգոր —  Տենց բան չեմ ասել, ու՞մ պտի ասեի տենց բաներ: Ես պռոստը ասել եմ էն մարդկանց, ովքեր էտ գործին խառնված են էղել, էն էլ մենակ էտ կամեռում: Դրանից հետո էլ, եթե ինձ էկել զգուշացրել են, որ ես կասկածվում եմ, նոռմալ մարդը…

Խորեն- Քեզ որ ընչի՞ համար էր կանչել էն տղեն ժամը տասին բանի (խոսքը անկոչ այցելուի մասին է-(Է.Մ.)):

Գրիգոր — Ես գաղափար չունեմ ուրեմն:

Խորեն — Ինչ, ի՞նչ խոսակցություն ա գնացե ընդե, ի՞նչ ա ասել:

Գրիգոր- Թե բա ասել ա ես գիտեմ, դու ուզում ես ժուռնալիստներին ասես էտ սպանության մասին: Դու ինձ ասա փող են խոստացել: Հա: Ես էլ որ գնացի, ես կարծեցի տունն ա բան պատահե, դրա համար են գիշերը ինձ իջացնում տեսակցության, որտև ես ի՞նչ իմանայի դայա:

Խորեն- Բա ի՞նչ դեբոշ ա էղել ընդեղ:

Գրիգոր- Ընդեե ոչ մի դեբոշ չի էղե հաստատ:

Խորեն- Բա խի, ինչի համար ինձ ասեցիր արդեն ուշ ա:

Գրիգոր-Ե՞րբ եմ ասե արդեն ուշ ա:

Խորեն- Որ ըը բանի կաբինետից խոսացիր:

Գրիգոր- Բանի ձեռքո՞վ, հա՞:

Խորեն- Հա:

Գրիգոր- Տենց բան չեմ ասել, ասեցի ես ի՞նչ իմանայի, որ ինձ իջացրել ա ներքև: Ասեցիր դու ոչ մեկի հետ մի հանդիպի, ասի արդեն ուշ ա, ինձ իջացրել են դրա մոտ հանդիպման, բա որ տային գլուխս ջարդեին: Բա որ տար գլուխս ջարդեր, դա քսիֆ էր ուղարկել շանտաժ անելու, հետո էլ իջացրեց բան, էտ քսիֆը ուղարկեց, որ քսիֆին չեմ պատասխանել, ըսկի չեմ էլ կարդացե ես մարդավարի, որտև ձեռագիրը նենց էր:

Հետո նրանց խոսակցությունից պարզ է դառնում, որ «քսիֆին չպատասխանելուց օրեր անց Խորենի և նրա զոքանչի տանը խուզարկություններ են արել փամփուշտ, զենքեր գտել և դրանք տեղափոխելուց  ցույց տվել (հավանաբար հեռուստացույցով) նաև նրանց հարազատներին, ովքեր կալանավորվելու վտանգի առջև են, ինչպես նաև Գրիգորին արգելել են տեսակցել հարազատների հետ կամ հեռախոսով զանգել նրանց… (զրույցի այս մասին միացել է նաև փաստաբանը):

Խորեն- …Արդեն ես մի ամիս ա կալանքի մեջ եմ:

Գրիգոր- Գիտեմ:

Խորեն-Մի ամիս ա կալանքի մեջ եմ, կնգաս էսօր կկալանավորեն կտանեն, նա Համիկին արդեն:

Փաստաբան-Էսօր չէ, վաղը, եթե կալանավորեն:

Խորեն- Վաղը կկալանավորեն կտանեն, Համիկին էլ, Զառային էլ, բոլորին, բոլորին, բոլորին:

Գրիգոր- Երեկ հանդիպել ե՞ս ոստիկանապետի հետ:

Խորեն- Հանդիպել եմ: Գրիգոր ջան, ամեն մեծ գառանծյաները տվել ա:

Գրիգոր-Հավատում ե՞ս:

Խորեն- Հա:Հա…Հավատում եմ: Ու ընդեղ շատ բարձր մակարդակով ա էս ամեն ինչը արվում…Հասկացա՞ր:

Գրիգոր — Բա էս հանգամանքները (սպանության-Է.Մ) ով պտի ինձ բացատրի, որ ես իմանամ ոնց ա էղել:

Խորեն — Ստեղ հիմնականում բանինն ա զենքինն ա, պտի ասես ճանապարհին շպրտել եմ, չեմ հիշում որտեղ:

Գրիգոր — Ես ե՞մ էղել:

Խորեն — Հա:

Գրիգոր — Տունը ո՞նց իմանամ որտեղ ա, ինչ ա: Ես գաղափար չունեմ:

Խորեն — Ես է չունեմ:

Գրիգոր — Բա ի՞նչ անենք, ի՞նչ գառանծյա

Խորեն — Գառանծիայի մասին ես ամեն ինչ, ինչ որ ասում եմ, ճիշտ եմ ասում:

Գրիգոր- Ինձ ինչքա՞ն են տալու:

Խորեն — Գրիգոր ջան քեզ տալու են շատ չնչին…Յոթ տարի, ութ տարի:

Գրիգոր — Հետո՞:

Խորեն — Հետո ամեն ինչ կկարգավորեմ:

Գրիգոր — Բա գու՞յքը:

Խորեն — Էտ հարցը եթե, եթե գնաց ըտենց ու ապացուցվեց, որ դու ես, գույքը, ամեն ինչը ետ ա դառնում, այսինքը նոր հանգամանքների բերումով, որ …ա ) նա մեղավորն էղե, որ քու գույքը տարել են: Էտ ա դրդապատճառն էղել…

Փաստաբան — Եթե ասվածը …(վերծանելի չի եղել) ես խոստացել եմ, որ ես կստանձնեմ էտ…գործի բանը, քո պաշտպանությունը, երևան եկած հանգամանքներով ու էտ սաղ:

Գրիգորը չի ցանկանում լսել այդ ամենը, որից հետո փաստաբանն ասում է.

Փաստաբան — Ախպոր պես, ես բան չեմ համոզում…Խոսքը նրա մասին ա, որ նոր երևան եկած հանգամանքների պայմաններում քրեական գործի հետ պտտելը մենք դարձնում ենք …գույքի մասով, օգնում ենք: (Այսինքն, սպանության գործով 7 տարի պատժաչափ են տալիս, որը որպես նոր ի հայտ եկած հանգամանք ներկայացնելով կրկին դիմում են դատարան` խարդախության գործը բեկանելու, այդ մասով արդարացնելու, որպեսզի հնարավոր լինի Նաջարյաններից գույքը հետ վերցնել):

Գրիգորը շարունակում է` երկմտել առաջարկի շուրջ, սակայն կրկին հարցնում է, թե ով պետք է իրեն բացատրի սպանության հանգամանքները, որպեսզի ինքը հետո կարողանա ներկայացնել:

Գրիգոր — …Բա լավ ո՞նց պտի էտ բացատրեմ ես, ես ե՞մ, թե…Էտ ե՞րբ եմ գնացե հասցրե էտ բանը անեմ, ինչո՞վ:

Խորեն — Չգիտեմ:

Գրիգոր — Բա ո՞վ պտի ինձ ասի:

Փաստաբան — Ես քեզ ասել եմ, որ սենց հարցերով ես խորհրդատու չեմ..

Խորե ն- Դու կարաս ասես` ես… խելագարված եմ էղե…ոչ մի բան չեմ հիշում: Ես եմ արել ու վերջ:

Գրիգոր — Տան տե՞ղը որտեից եմ քթել:

Խորեն — Չգիտեմ: Ես նույնիսկ չեմ հիշում փողոցը, տեղը, թե որ չենք տեսել, ո՞րդեղից իմանանք: Հենց տենց էլ ասի…

Գրիգոր — Սուսանին կանչել ե՞ն, քննել ե՞ն, չի ասե՞, որ տունն ա էղե:

Խորեն — Գրիգոր էտի ոչ մեկին չի հետաքրքրում Գրիգոր: Մենք մտնում ենք պրեսի տակ ու չորս … ութ հոգին դատվում են ու…

Գեներալ- Շատ կա՞ հլը:

Գրիգոր — Չէ… Ես ամեն ինչ հասկացել եմ: Հիմա ինձ ասեք` իրանց ե՞րբ եք բաց թողնելու:

Գեներալ — Մեզ երբ եք բաց թողնում: Հլը դուք ասեք տեսնեմ ինչ եք ասում…

Գրիգոր — Ի՞նչ ա հիմա ինձնից պահանջվում, որ անեմ:

Գեներալ- Մի բան լավ իմացի, որ մեզ պետք չի ինչ-որ մի բան:

Գրիգոր — Հասկանում եմ, հասկանում եմ…պարոն գեներալ:

Գեներալ — Ես ուզում եմ ձերն ասենք, վերջին հաշվով դե որ էտի ձեր` ախպերների գործն ա, էտի ես արդեն սկզբից էլ ասեցի: Բայց որտ ա գնալու, էտի արդեն դուք պտի որոշեք: Մեզ ձեռնտու չի, որ երկուստ է գնաք…

Գրիգոր- Չէ ես, էն ժամանակ որ մենք միասին էինք պարոն Բաբախքեխյանի հետ, ինքը մի հատ փաստաթուղթ …ցույց տվեց:

Գեներալ- էն զենք-զինամթերքի՞ պահով:

Գրիգոր — Հա:

Գեներալ — Դե էտ հեչ: Դա ինչ ա… Դե էս, դրանք մանրուքներ ա, հիմնական գործը մերը փոխոստիկանապետի սպանության բացահայտումն ա: Մնացածը երկրորդական բաներ են, տասներորդական բաներ են:

Հ.Գ. Ո՞վ է եղել այս գեներալը, ով և ում թույլտվությամբ հնարավոր կլիներ այդպես հանգիստ մտնել ՔԿՀ` այդպիսի աղմկահարույց գործով բանակցություններ վարելու, եթե այդ ժամանակ սպանության գործով քննչական խմբի ղեկավարը ՀՀ հատուկ քննչական ծառայության ՀԿԳ ավագ քննիչ Հեկտոր Սարդարյանն էր: Երկու տարի շարունակ` մինչև գործը ոստիկանությանը փոխանցելը, ինչո՞վ է զբաղված եղել Հատուկ քննչական ծառայությունը: Արդյո՞ք սա չի խոսում այն մասին, որ Մհերյանի սպանության գործը բացահատելու կամք ու ցանկություն չկա, և դա է պատճառը, որ 4 տարի  է անցել ու  «չեն կարողանում սպանությունը բացահայտել»:

Էլմիրա Մարտիրոսյան