Վաղը՝ հունվարի 23-ին Երուսաղեմի հայկական Սուրբ Յակոբ եկեղեցու միաբանները  կընտրեն Երուսաղեմի ՝ 97-րդ պատրիարքին:

Թեկնածուները չորս միաբաններ են. Բաբկեն ծ. վրդ. Անուշյան, Վիգեն արք. Հայկազյան, Խաժակ արք. Պարսամյան և ներկայիս առաջնորդական փոխանորդը՝ Արիս արք. Շիրվանյանը:

Մեր ունեցած տեղեկություններով,Արիս սրբազանը դուրս կմնա պայքարից  տարիքի պատճառով , Խաժակ սրբազանը կսատարի իր ընկերոջը, և ամենայն հավանականությամբ, հաշվի առնելով անցած ճանապարհն ու գործունեության լայն ասպարեզը, նաև միջեկեղեցական կառույցներում վայելած հարգանքն ու կապերը, Երուսաղեմի պատրիարք կընտրվի Վիգեն սրբազանը:

Նա ծնվել է Թուրքիայում, 1950-ին, և փոքր հասակից ուսանել է Երուսաղեմում ու ավարտել Ընծայարանի բաժինը, ապա 1968-ին ձեռնադրվել սարկավագ: 1971-ին, Երուսաղեմի պատրիարք Եղիշե արք. Տերտերյանի օրոք դարձել է կուսակրոն քահանա, ձեռնադրվելով աբեղա Ս. Էջմիածնում Վազգէն Ա. Ամենայն հայոց կաթողիկոսի ձեռամբ:

Նա երկար տարիներ եղել է Շվեցարիայի հայոց թեմի առաջնորդը, ապա 2007-2009-ին գլխավորել  ԱՄՆ եկեղեցիների ազգային խորհուրդը, որը բավականին լուրջ պաշտոն է:

Հիշեցնենք, որ Թորգոմ արք. Մանուկյանը ընտրվել  էր 1990-ի մարտ 22-ին , դառնալով Առաքելական Սուրբ աթոռի 96-րդ պատրիարքը: Նա  վախճանեց անցյալ տարի՝ հոկտեմբեր 12-ին, 93 տարեկան հասակում, և միաբանները տեղապահ ընտրեցին 78-ամյա Արիս Շիրվանյանին: