Վախճանվեց «Հայ ասմունքի ծանր հրետանի ու կենդանի լեգենդ» Վլադիմիր Աբաջյանը:

Երկարատև հիվանդությունից հետո Երևանում կյանքի 86-րդ տարում վախճանվել է ՀՀ ժողովրդական արտիստ, ասմունքի վարպետ Վլադիմիր Աբաջյանը, Գաբրիել Սունդուկյանի անվան ազգային ակադեմիական թատրոնի հիմնադիրներից մեկը։

Վլադիմիր Աբաջյանը ծնվել է 1927 թվականի նոյեմբերի 27-ին, Շիրակի մարզի Շիրակ գյուղում: 1951 թվականին ավարտել է Երևանի գեղարվեստա-թատերական ինստիտուտի դերասանական ֆակուլտետը:

Այնուհետև նա աշխատել է Երևանի Սունդուկյանի անվան ազգային ակադեմիական թատրոնում՝ խաղալով մի շարք դերերում` Օսեփ` Սունդուկյանի «Քանդած օջախ», Սագադաև` Աբդուլինի «13-րդ նախագահը», Սեյրան` Շիրվանզադեի «Նամուս» և այլն:

Աբաջյանը հանդես է եկել նաև կինոյում: Նա մեծ ճանաչում ունի ասմունքի բնագավառում: Երկացանկում հայ միջնադարյան, դասական և ժամանակակից բանաստեղծների գործեր են՝ (Գ.Նարեկացի, Ն.Քուչակ, Սայաթ-Նովա, Հ.Թումանյան, Ա.Իսահակյան, Վ.Տերյան, Պ.Սևակ, Հ.Սահյան և այլն):

1984 թվականին արժանացել է ՀԽՍՀ ժողովրդական արտիստի կոչման, իսկ 1998թ. պարգևատրվել է ՀՀ «Մովսես Խորենացի» մեդալով:

Վլադիմիր Աբաջյանը վերջին տարիներին Սունդուկյանի թատրոնի կողմից բեմադրված ներկայացումներում թատերական դերեր չուներ, սակայն ավելի վաղ թատերասեր հասարակայնությանը հայտնի էր սունդուկյանական «Արշակ երկրորդ» ներկայացման մեջ Գնելի և «Խաչմերուկ»-ում Միքայելի դերակատարումներով:

Աբաջյանն ասմունքի բացառիկ վարպետ էր, ստեղծել էր մոտ 50 նշանակալի դերատիպարներ, հանդես եկել կինոյում, հեռուստա և ռադիոբեմադրություններում:

1984թ. արժանացել է ՀԽՍՀ ժողովրդական արտիստի կոչմանը, 1998 թվականին պարգևատրվել «Մովսես Խորենացի» մեդալով:
Վլադիմիր Աբաջանը հաճախ էր կրկնում.«Ես ոտանավոր արտասանել չեմ կարող. առանց ասելիքի ասմունքն ինձ համար անիմաստ բան է: Դրա համար էլ ես ասմունքն ընտրեցի որպես երկրորդ մասնագիտություն»:

Նրա ազդեցիկ ձայնը հարազատ է յուրաքանչյուր հայի հոգուն, իսկ հիշատակը միշտ վառ կմնա մեր սրտերում:

Գարիկ Ավետիսյան