Հայաստանում ամենահեղինակավոր քաղաքական գործիչը Սերժ Սարգսյանն է, իսկ  երկրորդ տեղում է «Բարգավաճ Հայաստան» կուսակցության նախագահ Գագիկ Ծառուկյանը. այս մասին այսօր լրագրողների հետ հանդիպման ժամանակ տեղեկացրել է սոցիոլոգ Ահարոն Ադիբեկյանը :

Ըստ նրա, հեղինակություն հասկացության մեջ մտնում են ՝ կադրային քաղաքականության վճռականությունը, խստությունը, միջազգային կապերը, հարգանքը այլ երկրի քաղաքական գործիչների կողմից:
«Երրորդ տեղում Տիգրան Սարգսյանն է, չորրորդ տեղում՝ Լևոն Տեր-Պետրոսյանը, որից հետո գալիս է Արթուր Բաղդասարյանը, այնուհետև Րաֆֆի Հովհաննիսյանը և Պարույր Հայրիկյանը: Այս բոլոր անձանցից առաջադրված են միայն Րաֆֆի Հովհաննիսյանն ու Պարույր Հայրիկյանը: Ստացվում է, որ Սերժ Սարգսյանի մրցակից կարող է լինել Րաֆֆի Հովհաննիսյանը, քանի որ Պարույր Հայրիկյանը մնում է ավելի ստվերում»,- նշել է նա:

Նրա խոսքով, «Ազատություն կուսակցության» նախագահ Հրանտ Բագրատյանը ոչինչ չի արել նախագահ դառնալու համար և իր վարկանիշը գցեց՝ անհեռանկարային հայտարարություն անելով, իսկ նախագահի մյուս թեկնածուների՝ էպոսագետների ու թոշակառուների անունները մարդիկ չեն նշել:

«Եթե Ռոբերտ Քոչարյանին ևս ընդգրկեինք այստեղ, նա կարող էր լինել վարչապետի կողքին, պարզապես ընդգրկված են եղել միայն պոտենցիալ թեկնածուները»,-հավելել է նա: