«Մեր՝ սպառողներիս  ակտիվությունը պետք է շատ լինի, և եթե կասկածելի ապրանք ենք տեսնում, պետք է չզլանանք և դիմենք համապատասխան մարմիններ, նրանց կողմնորոշենք՝ նմուշ վերցնելու գործընթացում»,- այսօր «Վարկած» ակումբում հրավիրված ասուլիսին նման կոչով հանդես եկավ «Սպառողների միության» նախագահ Արմեն Պողոսյանը:

Նա համեմատական եզրեր անցկացրեց եվրոպական երկրների հետ, որտեղ, երբ մարդիկ զանգում և հայտնում են, որ ծառ կտրեցին կամ հարևանն  աղմկեց, այդ մարդուն պետությունը հարգում է, պարգևատրում:

«Ըստ իս, այդ մարդիկ հասարակության մեջ արժեքներ են և պետք է խրախուսվեն, իսկ մեզ մոտ տվյալ անձը պիտակավորվում է, դառնում «սպիտակ ագռավ»: Մեր առաքելությունը մարդկանց պահանջկոտության աստիճանը բարձրացնելն է»,-կարծում է նա:

Բանախոսը գտնում է, որ ցանկացած երկրում էլ լինում են խնդիրներ, բայց լուծման ձևը մնում է մեկը. պետական կառույցներն ու ԶԼՄ-ները պետք է սերտ աշխատեն ու օպերատիվ: Նա ճիշտ չհամարեց, որ երշիկների արտադրության բացահայտման մասին ինքը պետք է մամուլից իմանար. «Երեք «սպառողների շահերի պաշտպանության»  միություն կա, գոնե նրանք տեղեկացված լինեին, հետո դա իրենց գործն է՝ կգնային, թե՝ չէ:  Սպառողի շահերը պաշտպանող կազմակերպություններին պարտավոր են տեղեկացնել ստուգումների մասին: Դա կօգներ այս ամբողջ գործընթացի օբյեկտիվությանը, ընտրությանը. ինչո՞ւ մի ընկերություն հայտնվել է ցանկում, մյուսը՝ ոչ»,- նշում է Պողոսյանը:

Նա հավելում է, որ շատ վատ է, որ  այս գործընթացներից  իրենք անտեղյակ են: Եվ որպես  ենթադրություն՝ նկատում. «Կարելի է ասել, որ այստեղ և´ շահի խնդիր կարող էր լինել, և´ նրանք այնքան «զբաղված» են, որ կարող էին ասել գայիք՝ իմանայիք»: