Օրեր առաջ լրատվամիջոցներից մեկը  հրապարակել էր «Նուբարաշեն» քրեակատարողական հիմնարկում պահվող դատապարտյալ Արթուր Սմբատյանի բողոքը, իսկ այսօր նաև նրա մոր՝ Ռոզա Սարդարյանի նամակն այն մասին, որ քրեակատարողական հիմնարկի ղեկավարությունը «տարբեր պատճառաբանություններով մերժում է դատապարտյալին ընդգրկել «Մետադոն» կոչվող ծրագրում»:

Նշենք, որ «Մետադոնային փոխարինող բուժման» ծրագրի մեջ ընդգրկված անձը պարտավորվում է բուժման ողջ ընթացքում առանց բժշկի նշանակման չօգտագործել որևէ թմրամիջոց կամ հոգեմետ նյութ:

Արդարադատության նախարարությունից տեղեկացնում են, որ առաջին հրապարակումից անմիջապես հետո ՀՀ արդարադատության նախարարի հանձնարարությամբ փաստի առթիվ նշանակվել է ծառայողական քննություն:  Արդյունքների մասին կտեղեկացնենք քննությունն ավարտելուց հետո:

Փաստի առթիվ առավել մանրամասն տեղեկություն ստանալու նպատակով «Հայկական Վարկած»-ը զրուցեց ՔԿՀ վարչությունների մամուլի քարտուղար Գոռ Ղլեչյանի հետ, որը ձեռնպահ մնաց տեղեկություն հաղորդելուց՝ ասելով, որ չի կարող որևէ բան ասել, քանի որ դա կխանգարի նախարարի հանձնարարությամբ նշանակված ծառայողական քննությանը: