Ամերիկահայ ներդրող ու գործարար Ներսես Եսփանոսյանը գտնում է, որ անշարժ գույքի կադաստրի գործողությունների հետևանքով իր կրած վնասի հատուցման գործը կարելի է տեղափոխել ԱՄՆ և այնտեղ Ներդրումների պաշտպանության կենտրոնի քննության առարկա դարձնել: «Սպիտակ ափ» ՓԲԸ-ի սեփականատեր ամերիկահայ ներդրողը լուրջ ներդրումներ է կատարել Հայաստանում՝ Սևանա լճի հարակից տարածքում, մասնավորապես՝ ձեռք է բերել և ամբողջությամբ վերակառուցել պանսիոնատի հին շինությունը:

Ինչպես «Pastinfo.am»-ի թղթակցի հետ զրույցում հայտնեց սփյուռքահայ ներդրողի ներկայացուցիչ, փաստաբան Նիկոլայ Բաղդասարյանը, անշարժ գույքի կադաստրի տարածքային ստորաբաժանումը՝ առանց կողմին տեղյակ պահելու, փոխել է Սևանա լճի հարակից տարածքում 50 հեկտար արտադրագիտական կատեգորիայի հողատարածքի տիրապետման ձևը՝ սեփականությունը վերածելով վարձակալության: Այդ մասին սփյուռքահայ գործարարն իմացել է միայն դատարանում, որտեղ իրեն «անակնկալ են մատուցել»՝ պահանջելով վերակնքել վարձակալության պայմանագիրը: Կադաստրի կողմից սեփականության վկայականում կատարված «ուղղման» որոշումը անվավեր ճանաչելու հայցապահանջը Վարչական դատարանում և վերադաս ատյաններում մերժվել է, այսինքն՝ սպառվել են «կադաստրի ապօրինությունները» բողոքարկելու ներպետական հնարավորությունները:

Գործի նախապատմությունը հետևյալն է՝ «Լավանդա» հանգստյան գոտու անմիջական հարևանությամբ և նույն հարթության վրա գտնվող 50 հեկտար արտադրագիտական կատեգորիայի հողատարածքը ՀՀ Հողային օրենսգրքի փոփոխությունների ուժով սեփականության իրավունքով փոխանցվել է սփյուռքահայ գործարարին և նրա հիմնած «Սպիտակ ափ» ՓԲԸ-ին: Անձը դիմել է կադաստր և ստացել սեփականության վկայական: Եվս 30 հեկտարի՝ ավելի ճշգրիտ՝ 29.73 հա հողատարածքի նկատմամբ քաղաքապետարանի համայնքի հետ կնքվել է վարձակալության պայմանագիր:

Հողային օրենսգրքի 60-րդ հոդվածով նախատեսվում է սահմանափակում՝ հողատարածքը չի կարող սեփականաշնորհվել, եթե այն պատմամշակութային նշանակություն ունի, ջրային կամ անտառտնտեսության հողատարածք է: Ն. Բաղդասարյանն ընդգծեց, որ տարածքի կատեգորիան կարող էր փոխվել կառավարության համապատասխան որոշմամբ, ինչը տեղի չի ունեցել, հողատարածքի կատեգորիան փոխվել է «ջրային»-ի՝ կադաստրի ուղղումով: Ընդ որում, «ուղղումը» վերաբերել է ողջ հսկայական տարածքին, թեև դրա որոշ մասը գտնվում է Սևանա լճից բավականին մեծ հեռավորութայն վրա: Հետաքրքրական է նաև, որ «ուղղումը» չի տարածվել հարևան «Լավանդա»-ի վրա՝ պարզ տրամաբանությամբ նույն տարածքում, նույն աշխարհագրական դիրքում գտնվող «Լավանդա»-ի տարածքը նույնպես պետք է ջրային համարվեր:

Նիկոլայ Բաղդասարյանի գնահատմամբ, կադաստրի գործողություններում կա քրեական բաղադրիչ՝ դրսևորվել է խտրականություն և կամայականորեն փոխվել մարդու սեփականության իրավունքը:

«Փաստինֆո»