Երևանը հեքիաթային դարձնելու համար արդեն երկրորդ ամիսն է` ներմուծվում են լուսադիոդային տարբեր զարդարանքներ՝ կենդանիներ, ծառեր։ Քաղաքի տարբեր հատվածների արտաքին ձևավորման տարբեր լուծումներ են տրվելու, այդ թվում՝ զարդարվելու են նաև որոշ շենքերի ճակատային մասերը: Այս մասին այսօր հրավիրված համատեղ մամուլի ասուլիսի ժամանակ հայտարարել են Երևանի քաղաքապետարանի աշխատակազմի արտաքին ձևավորման և գովազդի վարչության պետ Արազ Բաղդասարյանը և Երևանի գլխավոր դիզայներ Գագա Ամատունին:

Երևանի արտաքին ձևավորման պատասխանատուները համոզված են, որ իրենք  անում  են լավագույնը, սակայն  ո՞վ է ասել,  որ նրանց  պատկերացումները արտացոլում են երևանցիների ցանկությունները: Մայրաքաղաքը վեր է ածվել կենդանաբանական այգու: Գլխավոր դիզայների՝ Երևանը  կենդանիներով ու հրեշտակներով զարդարելը որևէ կերպ արդարացված չէ:

Եթե ամեն ինչ արվում է հնարավորինս շատ ծախս ցույց տալու համար, այլ հարց է:

Ի դեպ, նրանք հավատացնում են, որ դեկտեմբերի 20-ից,  երբ Երևանի քաղաքապետ Տարոն Մարգարյանը կվառի հանրապետության գլխավոր տոնածառի լույսերը, նախատոնական Երևանը հեքիաթային կդառնա ու զգալի կլինի տոնական հրաշքի շունչը: Իսկ,  թե այդ շունչը ինչքան կնստի շարքային երևանցու վրա, կամ արդյո՞ք ամանորի շեմին մեզ պետք է սերտորեն առնչվել կենդանական աշխարհի մանրապճեղների հետ, բանախոսները չեն ասել: 

Նրանք տեղեկացրել են, որ այս տարի առաջին անգամ Երևանը կունենա Ամանորի խորհրդանիշ՝ հայկական մանրանկարչության մեջ հայտնի հրեշտակը,  որն, ըստ գտնված լուծման, պետք է լինի փողի մեջ (թե դա ինչ է նշանակում, կիմանանք, երբ դուրս գա: Իսկ միգուցե Վոլոչկովայի այցը գայթակղել է մերոնց, ու հիմա էլ,հրեշտակի փոխարեն Լեդի Գագան դուրս գա փողից). այն կազդարարի Նոր տարվա գալուստը: Իսկ գունային լուծումների համար ընտրված են կապույտն ու ոսկեգույնը. 2013-ը, ինչպես հայտնի է, Ջրային օձի տարի է, և ողջ աշխարհում կապույտը լինելու է գերիշխող գույն:

3D լուսային էֆեկտներ կլինեն. նաև մայրաքաղաքում երկու տեղ՝ մեկը կլինի Օպերայի և բալետի ակադեմիական շենքի ճակատին, իսկ մյուսի տեղը, ըստ քաղաքապետարանի պաշտոնյաների, դեռ գաղտնի է պահվում։

Հանրապետության գլխավոր տոնածառն ունի 32 մետր բարձրություն և կազմված է սանիտարական էտման-հատման ճանապարհով կտրված 6000 ճյուղից: «Տոնածառի ձևավորման համար օգտագործվել ու են ավելի քան 50 000 լուսադիոդային սարքեր, ընդհանուր լարերի երկարությունն անցնում է 17 կիլոմետրից, օգտագործվելու են նաև թարթող լույսեր»,- մանրամասնել է  Գագա Ամատունին:
Այս տարի Երևանի քաղաքապետարանը գերազանցել է ինքն իրեն. աշխատակազմի արտաքին ձևավորման և գովազդի վարչությունը հայտարարել է քաղաքային ամենագեղեցիկ զարդարված պատշգամբի, ճակատային մասի մրցույթ։

Հաղթողներն, իհարկե, կպարգևատրվեն, սակայն քաղաքապետարանը  գաղտնի է պահում այս անակնկալը:

Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը «Հայկական Վարկած»-ին տեղեկացրեց, որ զարդարանքների համար նախատեսվել է 20. 000.000 դրամ:

Իսկ մեր՝ վերը նշված հարցադրումներին, կապված քաղաքը  կենդանաբանական այգու վերածելու հետ, Արթուր Գևորգյանը հակադարձեց.

«Ինչո՞ւ չեք սովորում գեղեցիկը գնահատել, լրիվ արդարացված եմ համարում մտահղացումը, շատ գեղեցիկ է ու դեռ էլի են լինելու: Ես դրանք, որպես Երևանի քաղաքացի,  չեմ տեսնում  որպես կենդանիներ, ես տեսնում եմ զարդարանքներ»: