«Աքիլլես» հասարակական կազմակերպության նախագահ Էդուարդ Հովհաննիսյանն այսօր «Վարկած» ակումբում, լրագրողների հետ հանդիպման ժամանակ, խոսելով ապահովագրական ընկերությունների կողմից տաքսի սերվիսների մեքենաների ապահովագրելու անօրինական մերժումների և սահմանափակումների մասին, նշեց, որ վերջին ժամանակներում, տաքսի  մեքենաները՝ թե սերվիսների, թե մասնավոր սեփականության, չեն ապահովագրվում ընկերությունների կողմից, պատճառաբանելով, թե իրենց ձեռնտու չէ այդ գործառույթը, քանի որ վթարները տաքսիների հետ կատարվում է երեք անգամ ավելի հաճախ, քան սովորական մեքենաների հետ:

«Փաստորեն, այդ պատճառով, որոշ տաքսի սերվիսներ, ուղղակի չեն կարողանում շահագործել իրենց մեքենաները, որովհետև տուգանքը  բավականին մեծ է. 50 .000 դրամ, եթե չես ապահովագրել տրանսպորտային միջոցը, և ուժը կորցրած կտրոնի փակցված լինելու դեպքում, տուգանք՝ 150.000 դրամ»,-ասաց ՀԿ նախագահը:

Նրա խոսքով, պարզվում է, որ ապահովագրական բյուրոն տեղյակ չի, որ ապահովագրող ընկերությունները չեն ապահովագրում մեքենաններին. «Մեզ համար մի փոքր տարօրինակ է, քանի որ դա կրում է մասայական բնույթ, սակայն բյուրոն տեղյակ չէ, մյուս կողմից իրենք ճիշտ են, ասում են՝ մենք ոչ մի բողոք չենք ստացել. Ընդամենը երեք սերվիս է դիմել իրենց, իրենք էլ ասում են՝ մենք այս երեք սերվիսով կսկսենք զբաղվել»:

Վերջինս հրաժարվեց նշել, թե կոնկրետ որ ընկերություններն են հրաժարվել ապահովագրել, և հավելեց, որ  շատ դեպքեր են եղել, երբ ապահովագրական ընկերությունները տուգանվել են ՝ իրենց պարտականությունները ոչ պատշաճ կատարելու համար:

Սակայն դա հարցի լուծումը չի ապահովել, այլապես այսօր մարդիկ կարիք չէին ունենա շրջանցելու ինչ -ինչ խոչընդոտներ, արժանանալու ապահովագրական ծառայությունների բարի կամքին: Իսկ քանի որ տաքսի սերվիսները հիմնականում պատկանում են ոչ հասարակ ՀՀ քաղաքացիների, ստացվում է, որ այստեղ կարող է ևս մրցակցություն լինել, ըստ՝ կարողության աստիճանի: