Տեսանելի փոփոխություններ, որոնք փոխել են հաշմանդամություն ունեցող մարդկանց կյանքը, չունենք. այս մասին այսօր լրագրողների հետ հանդիպման ժամանակ ասել է «Փարոս» հասարակական կազմակերպության նախագահ Սուրեն Օհանյանը:

«Հաշմանդամություն ունեցող անձանց մասին կոնվենցիայի դրույթները Հայաստանում իրականություն չեն դարձել: Դրա խնդիրը պետության դանդաղկոտություն է: Մենք դանդաղ ենք ընկալում, թե ինչ է պետք անել»,- նկատել է նա  և ավելացրել, որ թեև ՀԿ-ները ժամանակին բարձրացնում են հաշմանդամություն ունեցող մարդկանց խնդիրները, սակայն հարցերը լուծում չեն ստանում:

«Իր չարած գործերի համար պետությունը պետք է պատասխանատվություն կրի, քանի որ իրականում անհրաժեշտ գումարները կան, պարզապես ցանկությունն է բացակայում»,-նշել է Օհանյանը:

Ասուլիսի մյուս բանախոս` «Հաշմանդամություն ունեցող անձանց շահերի պաշտպանության ազգային դաշինք» իրավաբանական անձանց միության գործադիր տնօրեն Մհեր Վասիլյանի  խոսքով, Հայաստանում հաշմանդամի համար շատ բան մատչելի չէ, այդ թվում՝ աշխատանքը. «Այսօր որքան էլ սահմանենք աշխատատեղեր ու միջոցառումներ կազմակերպենք նման ֆիզիկական խնդիրներ ունեցող մարդկանց համար, միևնույն է. նրանք չեն կարող լիարժեք օգտվել, եթե չկա մատչելիություն»: