ԲՀԿ-ն իրեն ոչ իշխանություն, ոչ էլ ընդդիմություն է հռչակել, պետք է հստակ կողմնորոշվի, հայտարարի իր ընդդիմադիր կողմնորոշման մասին և հենց այդ դաշտում էլ գտնվի.  այսօր՝ լրագրողների հետ հանդիպման ժամանակ ասել է «Ժառանգություն» խմբակցության պատգամավոր Զարուհի Փոստանջյանը:

Ըստ նրա`  լրատվամիջոցները  սխալ են ընկալել քաղաքական քննարկումներ սկսելու վերաբերյալ անհատ քաղաքական գործչի հայտարարությունը, նրա խոսքով, սխալ է, այս նախընտրական շրջանում մի քաղաքական գործչի կարծիքը հրապարակելը և դա ընկալել որպես պաշտոնական տեսակետ:

«Սա նախընտրական փուլում տեղի ունեցող հայտարարություն է, որն ունի իր ուրույն նպատակը: Հայտարարություն է, միգուցե բարի և անկեղծ ցանկություն տիկին Զոհրաբյանի կողմից, բայց սա ընկալել որպես քաղաքական կուսակցության կարծիք, տեղին չէ, դրա համար այն պետք է լինի այդ կուսակցության ծրագրային դրույթ, կուսակցությունը պետք է հայտարարի դրա իրագործման ուղիները»,- ընդգծել է նա:

Զարուհի Փոստանջյանի կարծիքով, ԲՀԿ-ն չի կարող լինել անկեղծ, և Հայաստանի երկրորդ նախագահ Ռոբերտ Քոչարյանը չպետք է հայտարարի, թե իր ստվերը պետք չէ գտնել, ըստ Փոստանջյանի ` մեծ տեսողություն պետք չէ դա տեսնելու համար, դա հասկանալի է:

Անդրադառնալով, ԲՀԿ-ի ներկայացուցիչների հետ «Ժառանգության» ներկայացուցիչների հանդիպմանը,  պատգամավորը նշել է. «Տիկին Զոհրաբյանը եկել, թակել է մեր դուռը, իսկ մեր դուռը բաց է բոլորի համար, ընդունել և զրուցել ենք», և ավելացրել, որ նմանատիպ խորհրդակցություններ բազմիցս են ունեցել, սակայն որևէ արդյունք չի տվել, իսկ բարձրացված խնդիրները միշտ եղել են օրակարագում: