Այսօր ազատության երգիչ Միքայել Նալբանդյանի ծննդյան օրն է։

Գրող, հրապարակախոս Միքայել Նալբանդյանը ծնվել է 1829թ-ի նոյեմբերի 14-ին, Նոր Նախիջևանում: Սովորել է հայրենի քաղաքում՝ Նոր Նախիջևանում, Գաբրիել Պատկանյանի դպրոցում։Դպրոցական տարիներից աչքի է ընկնում իր բացառիկ ընդունակություններով և ըմբոստ բնավորությամբ: Դրանով էլ որոշվում է նրա կյանքի հետագա ուղին:
Հոգևորական հալածանքներից և իշխանությունների հետապնդումից խուսափելով՝ 1853-ին մեկնում է Պետերբուրգ, որտեղ էլ հանձնում է համալսարանական քննություններ՝ հայոց լեզվի ուսուցչի իրավունք ստանալու համար։ Նալբանդյանը հայոց լեզու է դասավանդել Մոսկվայի Լազարյան ճեմարանում՝ միաժամանակ սովորելով Մոսկվայի համալսարանի բժշկական ֆակուլտետում՝ որպես ազատ ունկնդիր։ Հետագայում Նալբանդյանը երկու անգամ ուղևորություն է կատարում արտասահման։ Լոնդոնում եղած ժամանակ կապեր է հաստատում Գերցենի, Օգարյովի, Սեռնո Սոլովևիչի հետ։ 1862թ. վերադառնում է արտասահմանից Նոր Նախիջևան և այնուհետև հուլիսի 14-ին ձերբակալվում է ցարական ոստիկանության գործակալների կողմից և տարվում Պետերբուրգի Պետրոպավլովյան բանտը։

Նալբանդյանը վախճանվել է թոքախտից Սարատով նահանգի Կամիշին քաղաքի աքսորավայրում 1866 թվականի մարտի 31-ին։ Նրա աճյունը թաղված է Նոր Նախիջևանի Սուրբ Խաչ եկեղեցու բակում:
Նալբանդյանի անունը գլխավորապես կապված է շուրջ տասնյակ հեղափոխական երգերի հետ, որոնց մեջ ցույց է տալիս ազատության սերն ու գաղափարը: «Ազատություն», «Մանկության օրեր», «Մեր Հայրենիք» և մի շարք այլ բանաստեղծություններում նա ձգտում էր հեղափոխությամբ արթնացնել ժողովրդին: