Այսօր` նոյեմբերի 7-ին, ավտովթար է տեղի ունեցել Կոտայքի մարզում:
Ժամը 17:45-ի սահմաններում, քաղաքացին հայտնել է Ոստիկանության Կոտայքի բաժին, որՍևան- Երևան ավտոճանապարհի 15-րդ կիլոմետրին` Արծիվի արձանի մոտ, դեպի Երևան ընթանալիս, ավտոմեքենա է գլորվել ձորը:

Ինչպես դեպքի վայրից shamshyan.com-ին հայտնել է ֆոտոլրագրող Գագիկ Շամշյանը,  Աբովյան քաղաքի Գեղարդի փողոցի 5-րդ շենքի բնակիչ 30-ամյա Սոս Ավագյանը, վարելով «Ֆոլքսվագեն Պասսատ» մակնիշի 20 ՏԼ 146 համարանիշի ավտոմեքենան, վերը նշված հատվածում դուրս է եկել ճանապարհի երթևեկելի գոտուց և մոտ 200 մետր գլիվայր շրջվելով ապառաժ քարերի վրայով, գլորվելով հայտնվել է գետի մեջ:

Վթարի հետևանքով Ս. Ավագյանը տեղում մահացել է: Նրա դին ավտոմեքենայից դուրս բերելու համար փրկարարները օգտագործել են հատուկ ճոպաններ, քանի որ նշված հատվածը բավականին անանցանելի է, վտանգավոր: Փրկարարներին օգնում էին նաև այդ պահին նշված հատվածով անցնող ՀՀ ոստիկանության կազմակերպված հանցավորության դեմ պայքարի (6-րդ) Գլխավոր վարչության հատուկ նշանակության վարչության (սպեց) աշխատակիցներն ու քաղաքացիները:

Կարճ ժամանակում դեպքի վայր են ժամանել նաև Աբովյան բժշկական կենտրոնի հերթապահ խումբը, քանի որ վթարի վայրը իրենց վտանգ էր ներկայացնում, և չէր բացառվում, որ դին տեղափոխողները իրենք էլ վտանգի կենթարկվեն:

Դին դուրս բերելուց հետո շտապօգնության բրիգադն այն տեղափոխեց Աբովյանի դիահերձարան:

Տեղում ոստիկանության օպերատիվ քննչական խումբը պարզեց, որ մահացածը աշխատում էր ՀՀ Արդարադատության նախարարության դատական ակտերի հարկադիր կատարման Աբովյանի բաժանմունքում` որպես հարկադիր կատարող:

Վթարի վայրում քննչական աշխատանքները ղեկավարում էր Ոստիկանության քննչական Գլխավոր վարչության Կոտայքի մարզի քննչական բաժնի Կոտայքի քննչական բաժանմունքի քննիչ Վարդան Պողոսյանը:

Քննիչի հանձնարարականով ավտոմեքենան հատուկ տեխնիկայի միջոցով պետք է դուրս բերվի և տեղափոխվի ոստիկանության Աբովյանի բաժնի հատուկ պահպանման տարածք: