Այսօր Ազգային Ժողովում ՀՀ էներգետիկայի և բնական պաշարների փոխնախարար Արա Սիմոնյանը հայտարարեց, որ Հայաստանի էներգետիկայի և բնական պաշարների նախարարությունը պատրաստում է կառավարության որոշման նախագիծ, որի համաձայն Մեծամորի ատոմակայանի երկրորդ էներգաբլոկի գործողության ժամկետը կերկարաձգվի 10 տարով: Նրա խոսքով՝ սթրես թեսթերը, Ատոմային էներգիայի միջազգային գործակալության (ՄԱԳԱՏԷ) ուսումնասիրությունները թույլ են տալիս նման որոշում կայացնել: «Եթե մի փոքր կասկած ունենայինք ռեակտորի մետաղի հետ կապված, ապա այդ հարցը չէինք բարձրացնի»,-ասաց Ա. Սիմոնյանը՝ փարատելով նախկին վարչապետ Հրանտ Բագրատյանի կասկածները;

Փոխնախարարը հիշեցրեց, որ երկրորդ էներգաբլոկի գործունեության վերջնաժամկետն է 2016 թ.: Վերագործարկումից հետո (5 տարվա դադարից հետո ատոմակայանը վերագործարկվեց 1995 թ.) մոտ 110 մլն դոլար է ծախսվել էներգաբլոկի անվտանգությունը բարձրացնելու համար:

Ատոմակայանի աշխատանքի երկարաձգման մասին որոշումը ՀՀ կառավարությունում կքննարկեն 2013 թ. օգոստոսին: Ըստ Ա. Սիմոնյանի՝ ԱՄՆ կառավարությունը պատրաստակամություն է հայտնել աջակցել Հայաստանին՝ նման որոշում կայացնելու դեպքում:

Զուգահեռ պետք է աշխատանքներ իրականացվեն նոր ատոմակայանի կառուցման ուղղությամբ: Սակայն այդ նպատակով 2013 թ. բյուջեում միջոցներ նախատեսված չեն: Ըստ Ա. Սիմոնյանի՝ աշխատանքները փորձում են կազմակերպել այնպես, որ բյուջետային ֆինանսավորման անհրաժեշտություն չլինի: Մյուս տարի այդ նպատակով Հայաստանում կանցկացվի դոնոր երկրների ներիայացուցիչների կոնֆերանս: