«Ապարանի Մելիք գյուղում էկոլոգիական աղետ է»՝ Ֆեյսբուք սոցցանցում ահազանգ է հնչեցրել օգտատեր Ռուզաննա Ղազարյանը.

ՀՀ բնապահպանության նախարարության կայքէջում տեղադրված տեղեկատվության համաձայն, Արագածոտնի մարզի Մելիք գյուղին հարակից տարածքում` 9 բալ ուժգնությամբ երկրաշարժային գոտում, «ՄեգոԳոլդ» ՍՊԸ-ն պատրաստվում է կառուցել մոտ 7 հեկտար տարածք ընդգրկող նոր պոչամբար: Հիշատակված ընկերությունը հանդիսանում է Հայաստանի բնական պաշարների նկատմամբ անսահմանափակ ախորժակ ունեցող «Գլոբալ Գոլդ» ընկերության դուստր ընկերություն, որը 2006 թվականից ի վեր շահագործում է Ապարանի Մելիք գյուղին անմիջապես հարակից «Թուխմանուկի» ոսկու հանքավայրը:

«Հարկ ենք համարում նշել, որ հանքահարստացումն իրականացվում է հենց տեղում` Մելիք գյուղից մի քանի հարյուր մետր հեռավորության վրա, որի անմիջական հարևանությամբ գտնվում է նաև անմխիթար վիճակում գտնվող պոչամբարը: Պոչամբարը բազմիցս վթարի է ենթարկվել և փլուզվել` վնասելով գյուղի խմելու ջրի խողովակաշարը, խառնվելով խմելու և ոռոգելի ջրերին:..»,- գրել է օգտատերը:

Մենք փորձեցինք ԲՆ կայքում գտնել, նման տեղեկություն, պարզվեց՝ խոսքը հասարակական լսումների ծանուցման մասին է: Նշենք, որ ս.թ հոկտեմբերի 30-ին, ՀՀ Արագածոտնի մարզի Մելիք գյուղի գյուղապետարանում արդեն տեղի են ունեցել «Մեգո Գոլդ» ՍՊԸ Թուխմանուկի հարստացուցիչ ֆաբրիկայի պոչամբարի կառուցման աշխատանքային նախագծի վերաբերյալ շրջակա միջավայրի վրա ազդեցության հասարակական լսումներ:

Էկոլոգ Ինգա Զառաֆյանը, որը մասնակցել է հասարակական լսումներին, մեզ հետ զրույցում ասաց, որ քննարկմանը ներկա են եղել նաև «Գլոբալ Գոլդ» ընկերության  ներկայացուցիչ Հենրիխ Մկրտչյանը, Բնապահպանության փորձաքննության փորձագետ Լաուրա Բալայանը, եղել են նաև բնակիչներ:

«Բնակիչները հայտնել են իրենց բողոքները. նրանք ասել են, որ հիմնականում ջրի խնդիրն է, ջրատարների կառուցումը: Նրանք փոխհատուցում են ակնկալում: Մեր գնահատականն այն է, որ լսումները պատշաճ ձևով չեն եղել՝ ռիսկերի մասին պետք է խոսվի, ռիսկերի նվազեցման հարցը դրվի: Եթե խնդիրները կան, պետք է նոր լսումներ անել, տեղյակ պահել նաև բնակչությանը, որ իրենք էլ հայտնեն իրենց բողոքները»,- ասաց Ինգա Զառաֆյանը՝ հավելելով, որ վաղն «Էկոլուր» կայքում կտեղադրվի տեսանյութ, որում ներկայացված կլինեն բնակիչների բողոքները:

Հ.Գ.Ստացվում է, որ մի կողմից ԱԺ պատգամավոր ԱԺ Տնտեսական հարցերի մշտական  հանձնաժողովի նախագահ Վարդան Այվազյանը  չլսված ու ծանր մեղադրանքներ է հնչեցնում «Գլոբալ Գոլդ»-ի հասցեին, մյուս կողմից այդ ընկերությանը վստահվում է մեր երկրի տնտեսության մեջ նոր գործունեություն ծավալել: