Ավելի շատ տեսնում ենք քաղաքական հոբբի, քան ընտրարշավ: Թվում է, թե նախագահական ընտրություններում կվերընտրվի Սերժ Սարգսյանը. Այս մասին այսօր լրագրողների հետ հանդիպման ժամանակ նշել է քաղաքագետ Ռիչարդ Կիրակոսյան:

«Հիմնականում այն պատճառով, որ գոյություն չունի կենսունակ այլընտրանք: Դա կապված է նաև ադմինիստրատիվ ռեսուրսների հետ: Ես չեմ ասում հավանում են նրան, թե՝ ոչ, բայց ես ռեալ եմ նայում իրավիճակին, և չեմ տեսնում այլ թեկնածու»,- ընդգծել է նա:

Ըստ քաղաքագետի՝ ՀՀԿ-ի և ԲՀԿ-ի միջև գոյություն ունեն իրական հակասություններ, և դա հնարավոր է հանգեցնի իրական մարտահրավերների, երբ կուսակցություններն առաջադրեն նախագահի իրենց թեկնածուներին:
« Առաջիկա նախագահական ընտրությունները, այս առումով, տարբեր կլինեն նախորդ նախագահական ընտրություններից, երբ մենք ունեինք կեղծ թեկնածուներ՝ ինչպիսին էր Արտաշես Գեղամյանը կամ անհույս թեկնածուները: Այս դեպքում մենք տեսնում ենք իրական մրցակցություն»,- ասել է Ռիչարդ Կիրակոսյանը և ավելացրել, որ, այնուամենայնիվ, ոչ մի քաղաքական արշավի ականատես չենք լինում:
Բանախոսի խոսքով, եթե անգամ ԲՀԿ-ն թեկնածու չառաջադրի, ապա հակասությունն իրական է, ապացույցն էլ՝ պատգամավոր Վարդան Օսկանյանի դեմ հարուցված գործն է:

Անդրադառնալով ՀԱԿ-ի և ԲՀԿ-ի  հարաբերություններին, քաղաքագետը կարծիք է հայտնել, որ նրանց  «պարը» միանշանակ տանգո չէ:

«Տանգոն պահանջում է երկու կողմ: Պարողներից մեկը չի ցանկանում պարել: Իրականում ավելի խորն է խնդիրը, ոչ թե պարն է խնդիրը, այլ երաժշտություն չկա: Ընդհանուր միջավայրը չի տրամադրում, և ակնհայտ է, որ նրանք իրար չեն սիրում: Ռոմանտիզմ չկա պարի մեջ: Ես երբեք չեմ կարողացել հասկանալ, թե նրանք ինչ են մտածում: Բայց մի բան ասեմ. Դավիթ Շահնազարյանը այս շարժումը սկսողներից մեկն էր, բայց նա խելացի քայլ կատարեց, որ դուրս եկավ այս գործընթացից»,- նկատել է նա: