Հայաստանի հավաքականի կիսապաշտպան Հենրիխ Մխիթարյանը Չեմպիոնների լիգայի «Շախտյոր»-«Չելսի» հանդիպումից հետո զրուցել է ուկրաինական ակումբի պաշտոնական կայքի թղթակցի հետ:

— «Չելսին» լավ թիմ է, բայց, փառք Աստծո, մենք խփեցինք արագ գոլ: Դա թույլ տվեց ավելի հեշտ խաղալ: Մրցակցի մոտ ի հայտ եկան ազատ գոտիներ, ու մենք կարողացանք պահեր ստեղծել: Ցավալի է, որ չկարողացանք իրացնել պահերը, բայց կարևորը’ հաղթեցինք:

— Հարկ եղա՞վ ջանք գործադրել, սովորականից շատ վազել:

— Այո: Սա Ուկրաինայի առաջնությունը չէ: Լիգայում պետք է արագ տեղափոխվել, փակել գոտիները: Անցկացնել արագ գրոհներ: Այստեղ հեշտ մրցակիցներ չեն լինում: Բոլոր թիմերն էլ շատ ուժեղ են: Պետք է իմանալ’ ինչպես պաշտպանվել, ինչպես հարձակվել: Հասկանում էինք, որ հեշտ չի լինելու ու անում էին հնարավորը, որ հաղթենք:

— Կարելի՞ է, ասել, որ մի փոքր զգուշանում էիք «Չելսիից»:

— Չեմ կարող այդպես ասել: Ներկայումս մեր թիմը վերելքի վրա է ու պետք է այդպես էլ շարունակել: Դեռ ոչինչ ավարտված չէ: Մեզ հարկավոր է դեռ շատ երկար աշխատել:

— Երբ բաց թողեցիք գոլ, մտավախություն չառաջացա՞վ, որ կարող եք բաց թողնել հաղթանակը:

— Նման բան չկար: Մենք լավ էինք խաղում ողջ խաղի ընթացքում: Շատ հանգիստ, հավասարակշռված:

— 15 հարվածը Պետր Չեխի դարպասին. սա ֆենոմենալ արդյունք է: Բայց հարց է առաջանում. ինչպե՞ս նրան գոլ խփել:

— Չէ որ երկու անգամ խփեցինք (ժպտում է): Կարող էինք ու ավելին: Սա ֆուտբոլ է: Չի կարելի իրացնել բոլոր պահերը: