Համաշխարհային բանկը (World Bank) և Միջազգային ֆինանսական կորպորացիան (IMF) համատեղ հրապարակել են Doing Business (Գործարարությամբ զբաղվելը) ամենամյա զեկույցի այս տարվա «Doing Business 2013» թողարկումը։ Այս զեկույցը ցույց է տալիս, թե որքանով է հեշտ կամ դժվար այս կամ այն երկրում սկսել փոքր կամ միջին բիզնես՝ 11 տարբեր չափորոշիչների տեսանկյունից՝ «Բիզնեսի մեկնարկը», «Շինարարության թույլտվության տրամադրումը», «Էլեկտրամատակարարման ապահովումը», «Սեփականության գրանցումը», «Վարկերի ստացումը», «Ներդրողների պաշտպանվածությունը», «Հարկերի վճարումը», «Արտաքին առևտուրը», «Պայմանագրերի կիրարկումը» և «Սնանկության գործերով որոշումների կայացումը»:

Ըստ զեկույցի՝ գործարարությամբ զբաղվելու հեշտության տեսանկյունից Հայաստանը զբաղեցնում է 32-րդ տեղը՝ նախորդ տարվա 50–րդ տեղի համեմատ:

Առաջին տեղում, ինչպես և նախորդ տարի, Սինգապուրն է, երկրորդ տեղում՝ կրկին Հոնգ Կոնգը, իսկ լավագույն եռյակը եզրափակում է մեկ կետով վեր բարձրացած Նոր Զելանդիան։

Վրաստանն իր դիրքերը բարելավել է 3 կետով և զբաղեցրել 9-րդ հորիզոնականը։
Մեր մյուս հարևան Ադրբեջանը նահանջել է 1 կետով և այժմ 67-րդ տեղում է։ Ռուսաստանը տեղ է զբաղեցրել 112-րդ հորիզոնականում՝ բարելավելով իր դիրքերը 6 կետով։

Ամենամեծ առաջընթաց Հայաստանն արձանագրել է «ներդրումային միջավայր» ենթացուցիչում՝ միանգամից 73 կետով (նախորդ տարվա 98-րդ տեղի համեմատ այս տարի զբաղեցնում ենք 25-րդ տեղը):

«Հարկերի վճարում» ենթացուցիչով Հայաստանն արձանագրել է առաջընթաց 44 կետով՝ 152-րդ տեղից բարձրանալով 108-րդ տեղ: Գրեթե նույնքան՝ 42 կետանոց առաջընթաց է գրանցվել «Էլեկտրամատակարարման ապահովման» ոլորտում. 101-րդ տեղ՝ նախորդ տարվա 143-րդի համեմատ։
«Վարկերի ստացման» 2 կետով Հայաստանը զիջել է իր դիքերը՝ 40-րդ տեղից՝ 38-րդ տեղ։

1-ական կետով էլ վիճակը վատթարացել է «Արտաքին առևտրի» ոլորտում՝ 107-ից՝ 106-րդ տեղ: «Շինարարության թույլտվության տրամադրում» ոլորտում Հայաստանը 46-րդ տեղում է, իսկ «Բիզնեսի մեկնարկ» ցուցիչում Հայաստանը բավական բարձր դիրքերում է՝ 11-րդ տեղ՝ նախորդ տարվա 10-րդի փոխարեն։
Նշենք, որ զեկույցում քարտեզի վրա Հայաստանի փոխարեն նշված է Բոսնիա-Հերցեգովինան։