«Հայկական Վարկածը» ինչպես արդեն տեղեկացրել ենք, նախորդ հրապարակման մեջ, այցելել էր  Հաղթանակ գյուղում գտնվող ծերանոց՝  թիվ 1 տուն-ինտերնատ:

Զրույցը տնօրենի՝ Արմեն Գյուրջյանի հետ սկսեցինք վերջին օրերի ամենաարդիական հարցից.

— ՀՀ տնտեսական մրցակցության պաշտպանության պետական հանձնաժողովը կատարել է հերթական ուսումնասիրությունը՝ պետական գնումների շրջանակում, և հայտնաբերել է մի շարք խախտումներ ծերանոցներում և մանկատներում, Ձեր ծերանոցում հայտնաբերվե՞լ են չարաշահումներ.

-Ոչ, ոչ մի չարաշահում մեզ մոտ չի հայտնաբերվել, ամեն ինչ նորմալ է, թղթերը հանձնել ենք, ամեն ինչ ճիշտ է եղել: Հետևողական ենք մենք մեր գնային քաղաքականության մեջ:

— Վերջերս որոշակի լարվածություն է ստեղծվել ԲՀԿ-ի շուրջ, «Բարգավաճ Հայաստան» կուսակցության անդամ լինելը չի՞ խանգարում աշխատանքին:

-Ոչ, աշխատանքիս չի խանգարում:

 Տուն ինտերնատն ունի 250 տարեց բնակիչ և 60 անօթևան: 6 մասնաշենքից երկուսն են վերանորոգված:

Տնօրենի հետ կարճատև զրույցից հետո այցելեցինք ծերերին. նրանց մեջ կային ուրախ ու տխուր, իրենց ճակատագրի հարվածները լռությամբ տանող և դժգոհող տարեցներ:

Նրանցից մեծ մասն այստեղ է հայտնվել հարազատների պատճառով՝ կամ բնակարանն են վաճառել, և արդյունքում, ծնողներին դուրսը թողել, կամ էլ միասին հաշտ չեն ապրել: Նրանց ճակատագրերը շատ բաներով նման էին իրար:

Օնիկ պապը, պատմեց, որ ինքը մարտի 1-ից գտնվում է ծերանոցում, ժամանակին մեծ պաշտոններ է զբաղեցրել 65 տարվա աշխատանքային ստաժ ունի: Աշխատել է դասախոս՝  ունեցել է հարյուրավոր ֆիզմաթն ավարտած աշակերտներ, ապա հանրակացարանի կամենդատ է եղել:

Նա պատմեց, որ որպես կամենդատ, 24 շենքի 3 հարկում բնակարան է ստացել. «Ամենալավ բնակարաններից մեկն է, որտեղ ապրում ա Ռոբերտ Քոչարյանի մասաժիստ՝ Բաղդասարյան Էդիկը, ես եմ տվել՝ իմ համաձայնությամբ: Երկու լավ տղաներ ունեմ Մասկվայում են՝ մեկն ամուսնացած է, մեկը՝ ոչ: Կինս էլ է էնտեղ: Շուտով կգան Երևան, տուն կգնենք: Ես ժամանակավոր եմ, չնայած ղեկավարությունն ասում է, թե ժամանակավոր չեմ, թղթերս ստորագրված են, որ հիմնական մնալու եմ», — մանրամասնեց հույսը չկորցրած Օնիկ պապը:

Իսկ Նվարդ տատը, մեր հարցին, թե լավ է ծերանոցում, ապահովա՞ծ է ամեն ինչով, պատասխանելով, որ այո, շատ լավ է, ամեն ինչ ունեն, այնուամենայնիվ չկարողացավ զսպել արցունքները: Նա պատմեց, որ երեխա չունի, ամուսինը մահացել է, ինքն էլ Լենինգրադյան փողոցի տունը տվել է քրոջ որդուն, վերջինն էլ վաճառել է և գնացել ԱՄՆ, իսկ ինքն էլ, մնալով դրսում, հայտնվել է ծերանոցում:

Մի տատիկի էլ ծերանոցի դուռն էր հասցրել  միակ աղջկա ամուսինը, որը վաճառել էր բնակարանը, և մի գրոշ անգամ չէր տվել նրան:

Խնդիրներ Տուն ինտերնատը շատ ունի, որոնց կանդրադառնանք առանձին հրապարակմամբ:

Աննա Սարգսյան