Արդեն  մի  քանի օր է, ինչ Միացյալ նահանգների  դատ ու դատաստանի  առաջ  կանգնած  պատգամավոր Վարդան Այվազյանը, փորձում է մեկնել Հնդկաստան, որտեղ նա  նախնական պայմանավորվածություններ ուներ հյուրանոց կառուցելու եւ տեղի գործարարների հետ նոր  բիզնես  գործարքներ   սկսելու համար: Սակայն, նրան ՀՀ իշխանությունները,  դեռեւս  թույլ չեն տալիս  ոտքը դուրս դնել  Հայաստանից, քանի որ միջազգային «բազար»-ի տակից դեռ դուրս չեկած, Այվազյանը, ընկել է մի նոր թեմայի ու տհաճ խոսակցության մեջ, որի առանցքում, դարձյալ մեր գյուտարար  վարչապետ Տիգրան Սարգսյանն է:

Ըստ քաղաքական դաշտում պտտվող լուրերի, Այվազյանը, ՀՀԿ ծերակույտի մոտ «քլնգել» է վարչապետ Տիգրան Սարգսյանին, ասելով, որ ՀՀ Կառավարությունը, թող չբերի ու իր  արած ու չարած գործերն ու «բաց թողնված» ստորագրությունները փաթաթի իմ վզին:  Սակայն  Այվազյանի նյարդային  տվայտանքների  ալիքը,  հասել է  նաև վերևներին, որոնց կողմից պատգամավորին  զգուշացվել է, այս օրերին զսպվածություն ցուցաբերել, և վարչապետին քննադատելով՝  ակամայից ջուր չլցնել վարչապետական հովեր ունեցողների ջրաղացին: Այսինքն` նոր  շրջանառվող վարկածի  համաձայն` փոխվարչապետ Արմեն Գեւորգյանի, իսկ  հին  վարկածի  համաձայն`ՀՀ նախագահի աշխատակազմի ղեկավար  Կարեն Կարապետյանի ու  ԱԺ նախագահ Հովիկ Աբրահամյանի,  որոնց  հարաբերությունները զուլալվեցին միմիայն  խնամիներ դառնալուց հետո:

Ինչ վերաբերում է բոլոր ժամանակների  ճարպիկ խաղացող Վարդան Այվազյանին, որի «փոթերը»  գնալով  բացվում են, ապա  ևս մեկ անգամ հիշեցնենք, որ Միացյալ Նահանգների Նյու Յորքի հարավային շրջանի Դատական ակտերի կատարման ծառայությունը կատարման է տրամադրել Կատարողական թերթ՝ Վարդան Այվազյանի հանդեպ ` հօգուտ «Գլոբալ Գոլդ Մայնինգ» ՍՊԸ-ի։ Արդյունքում «Գլոբալ Գոլդ Մայնինգի» օգտին կայացրած որոշմամբ պետք է գանձվի 37 537 978 դոլար, որը պետք է վճարի Վարդան Այվազյանը: Վերջինս հրապարակավ իր անհամաձայնությունը հայտնեց վճռի հետ, սակայն խոսք չեղավ վճիռը բողոքարկելու, կամ հետաքննություն սկսելու մասին:

Այվազյանն, ընդամենը,  իր սովորության համաձայն լոպազացավ, ասելով որ ինքը առնվազն պետական փրկիչ է, այլ ոչ  թե գլոբալ խոշոր քցող: Պատգամավոր Այվազյանին առավել տիպիկ որակումներ էր տվել նաև  բնապահպան ակտիվիստ Եղիա Ներսիսյանը, ասելով.«Վարդան Այվազյան կոչվածը այն մարդն է, որ Հայաստանը ծախեց, հենց իր օրոք Հայաստանը ծախվեց: Ինքը պիտի դատվի՝ որպես ազգի դավաճան, ինքն է տվել բոլոր հանքերը շահագործման թույլտվությունները, իր տղայի անունով էլ Հրազդանում և ՀՀ տարբեր շրջաններում հանքեր կան: Վարդան Այվազյանն էր, որ Թեղուտի հանքի լիցենզիան տվեց: Ու հենց այս պատճառներով էլ նա չի ցանկանում նշված դատական գործի կապակցությամբ շատ խորանալ»:

Մնում էր խորանար ու հիմնահատակ անցներ պատմության գիրկը: Թեև, դրան էլ շատ քիչ ժամանակ է մնացել:

ԱՆՆԱ      ՆԵՐՍԻՍՅԱՆ