ՀՀ Աժ պատգամավոր, Հայաստանի Հանրապետական կուսակցության անդամ Արթուր Ստեփանյանը սեպտեմբերի 1-ի՝ Գիտելիքի և դպրության օրվա առթիվ, շնորհավորական ուղերձ է հղել Քանաքեռ-Զեյթուն վարչական շրջանի 11 դպրոցների աշակերտներին ու մանկավարժներին, իսկ առաջին դասարանցիներին նվիրել գրենական պարագաներ։

ԱԺ պատգամավորի շնորհավորական ուղերձում ասվում է.

«Սիրելի դպրոցականներ, հարգելի մանկավարժներ,

Սրտանց շնորհավորում եմ բոլորիդ սեպտեմբերի 1-ի` Գիտելիքի և դպրության օրվա առթիվ: Ուսումնական տարվա մեկնարկի կապակցությամբ առանձնակի ջերմությամբ կցանկանայի շնորհավորել առաջին դասարանցիներին, ովքեր ծնողների ձեռքը բռնած մուտք են գործում դպրոցական աշխարհ` լի անհոգ ու լուսավոր ապրումներով, բազում հետաքրքիր ու գեղեցիկ ակնթարթներով: Ցանկանում եմ, որ ուսումնառության այս տարիները ձեզ համար լինեն ամենահիշարժանն ու ամենաարդյունավետը:
Օրվա առիթով ցանկանում եմ նաև երախտագիտության խոսք հղել մեր ուսուցիչներին` մեծ նվիրումով ու բարձր պատասխանատվությամբ այդ կարևոր առաքելությունն իրականացնելու համար:

21-րդ դարում գիտելիքն է հասարակությունների զարգացման շարժիչ ուժն ու զարգացումն ապահովող գործոնը: Մեր պետությանն այսօր կրթված ու զարգացած հասարակություն է անհրաժեշտ՝ երկրի կայուն առաջընթացն ապահովելու համար: Իսկ այդ հասարակության կերտողը և երկիրը շենացնողը դո՛ւք եք լինելու: Միայն գիտելիքի շնորհիվ մենք կկարողանանք ամրապնդել ու հզորացնել մեր պետականությունը: Կարող ենք և պարտավոր ենք շենացնել մեր հայրենիքը:

Եվս մեկ անգամ շնորհավորում եմ ձեզ այս գեղեցիկ օրվա առթիվ, մաղթում նորանոր հաջողություններ և ձեռքբերումներ»: