ԱԺ «Հայ ազգային կոնգրես» խմբակցության պատգամավոր Նիկոլ Փաշինյանը օգոսոտոսի 24-ին հետևյալ բովանդակությամբ հարցումն է ուղարկել կառավարությանը.

ՀՀ վարչապետ
Տիգրան Սարգսյանին.

Պարոն Սարգսյան.

«Ազգային ժողովի կանոնակարգ» օրենքի 105-րդ հոդվածի սահմանված կարգով կառավարությանն եմ ուղղում հետևյալ հարցը.

Կառավարության գործունեության ծրագրի (ընդունվել է ԱԺ լիագումար նիստում, 21.06.2012թ.)՝ «3.2.3. Կրթությունը և գիտությունը» գլխում նշված է հետևյալը (մեջբերում եմ).

-յուրաքանչյուր առաջին դասարանի աշակերտին անվճար տրամադրվելու է համակարգիչ (մեջբերման ավարտը):

Պարոն Սարգսյան.

Ե՞րբ և ինչպես են 2012-13թթ. ուսումնական տարվա առաջին դասարանցիներին տրամադրվելու խոստացված անվճար համակարգիչները: Կարո՞ղ եք արդյոք երաշխավորել, որ 2012-13թթ. ուս տարվա առաջին դասարանցիները խոստացված համակարգիչները կստանան մինչև ձեր կառավարության՝ ՀՀ Սահմանադրության 55 հոդվածի 4) կետով նախատեսված հրաժարականը:

Կանխավ շնորհակալություն:

ՆԻԿՈԼ ՓԱՇԻՆՅԱՆ (114)

Փաշինյանը նույնաբովանդակ հարց է ուղղել նաև ԿԳ նախարար Արմեն Աշոտյանին, որում մասնավորապես ասվում է. «Պարոն Աշոտյան, ի՞նչ միջոցներ եք ձեռնարկել մինչեւ ուսումնական տարվա մեկնարկը խոստացված համակարգիչները առաջին դասարանցիներին հատկացնելու համար»: ԿԳ նախարարը հարցմանը պետք է պատասխանի տասն օրվա ընթացքում, իսկ վարչապետը ԱԺ աշնանային նստաշրջանի ԱԺ-կառավարություն հարցուպատասխանի ժամանակ: