«Ինտերնետ հանրություն» ՀԿ փոխնախագահ Գրիգոր Սաղյանն այսօր լրագրողների հետ հանդիպմանը նշել է, որ Հայաստանում ինտերնետը չի ֆիլտրվում, բայց հանցագործություններն էլ  չեն ավելանում:

Ըստ նրա` am դոմեյնում գրանցվելուց առաջ նախ պետք է ծանոթանալ գործող կանոններին, իսկ դրանք խախտելու դեպքում կազմակերպությունը իրավասու է փակել կայքը:  «Am-ում այժմ գրանցված է   20 հազար անուն հասցե, և այստեղ կատարվող անօրինականությունների համար պատասխանատու է Հայաստանը»,- ասել է նա:

Սաղյանի խոսքով` armgirls կայքը տեղեկատվական կայք է և փակելու կարիք չկա, քանի որ այնտեղ պոռնոգրաֆիա չկա, պոռնոգրաֆիական է եղել Անժելա Սարգսյանի կայքը, որը փակվել է դատական միջամտությամբ:

Գրիգոր Սաղյանա նշել է, որ հեռահաղորդակցության միջազգային միությունը իր անդամ երկրներին ներկայացրել է ինտերնետը վերահսկելու առաջարկներ: Մասնագետը  տեղեկացրել է, որ Հայաստանում ինտերնետից սահմանափակումներ եղել է մեկ անգամ` 2008 թվականի մարտի 3-20-ը, որը պայմանավորված էր երկրում արտակարգ վիճակով: «Հայաստանը միացել է կիբերհանցագործությունների դեմ պայքարին, որին օրինակ` Ռուսաստանը չի միացել` համարելով, որ դա միջամտություն է իր ներքին գործերին: Ռուսաստանում այժմ ստեղծվում է հատուկ կառույց, որը վերահսկելու և ֆիլտրելու է ինտերնետը»,- ասել է նա:

Ի դեպ, առաջիկայում Բաքվում կայանալու է ինտերնետ-կառավարման ֆորում, որի ժամանակ քննարկվելու են ազատությունը չսահմանափակող հարցեր: Այդ ազատությունը, սակայն, չի հանգեցնի հանցագործությունների աճի: