Պետական եկամուտների կոմիտեի նախագահ Գագիկ Խաչատրյանն իր ունեցվածքի պատճառով հաճախ է հայտնվում մամուլի ուշադրության կենտրոնում: Սակայն իր գույքի և եկամուտների հայտարարագրերով ցույց է տալիս, թե «համեստ» կյանքով է ապրում:

Ուսումնասիրելով Գագիկ Խաչատրյանի՝ 2009թ. գույքի և եկամուտների հայտարարագիրը, պարզվում է, որ նա այդ տարի ունեցել է ընդամենը 53 միլիոն 833 հազար 900 դրամ եկամուտ և ուրիշ ոչինչ:

Նույն «չոր ու ցամաք» վիճակին է եղել նաև 2010թ-ին: Այդ տարի էլ հայտարարագրել է միայն դրամային եկամուտ և ուրիշ ոչինչ` 58 միլիոն 75 հազար 880 դրամ:

2011թ.-ը բեկումնային է եղել Գագիկ Խաչատրյանի կյանքում: Այդ տարի պետեկամուտների կոմիտեի նախագահը, թեև  ոչ շարժական, ոչ անշարժ գույքի հետ կապված գործարքներ չի արել, չի ունեցել արժեթղթեր, այլ ներդրումներ, հանձնված կամ վերադարձված փոխառություններ, ինչպես նաև 8 միլիոն դրամը կամ համարժեք արժույթը գերազանցող գույք, սակայն հայտարարագրել է մի քանի անգամ շատ ֆինանսական միջոցներ, քան նախորդ տարիներին:

2011թ.-ի ավարտին Գագիկ Խաչատրյանն ունեցել է 278 միլիոն դրամ և 2 միլիոն 980 հազար դոլար: ՊԵԿ նախագահի նույն տարվա  միակ եկամուտը եղել է նրա աշխատավարձը` 8 միլիոն 463 հազար 500 դրամ:

Իր ֆինանսական միջոցներով ամուսնուն չի զիջում Գագիկ Խաչատրյանի կինը` Լաուրա Եփրեմյանը: Նա էլ անշարժ ու շարժական գույքի, ինչպես նաև ներդրումների ու արժեթղթերի հետ կապված գործարքներ չի կատարել, սակայն հայտարարագրել է միլիոնների հասնող դրամական միջոցներ:

Լաուրա Եփրեմյանը 2011թ.-ին հայտարարագրել է 188 միլիոն դրամ և 2 միլիոն 765 հազար 200 դոլար: ՊԵԿ նախագահի տիկնոջ եկամուտի միակ աղբյուրը նույնպես աշխատավարձն է ու դրան հավասարեցված վճարները` 671 հազար 740 դրամ:

Հետաքրքիր է, բարձրաստիճան պաշտոնատար անձանց էթիկայի հանձնաժողովը կհետաքրքրվի՞, թե եկամուտի միակ աղբյուր հանդիսացող աշխատավարձով, ինչպես են միլիոնների հասնող դրամական միջոցներ կուտակել ՊԵԿ նախագահն ու նրա կինը, և ամենակարևորը` ի՞նչ ճանապարհով, երբ հայտարարագրում եկամտի այլ աղբյուրներ չեն նշել:

Ի՞նչ է գրում մամուլը

Ինչպես նշեցինք, մամուլը բազմիցս անդրադարձել է Գագիկ Խաչատրյանի բիզնեսներին ու եկամուտներին, թե՛ Հայաստանում, թե՛ երկրի սահմաններից դուրս:

Ըստ հրապարակումների` ՊԵԿ նախագահին է պատկանում Եղվարդից Երևան եկող 269 համարի երթուղին և «Անի» տաքսի ծառայությունը, ինչպես նաև տարբեր ապրանքների ներկրումներով զբաղվող «Ապեյրոն» և «Չիմեգ» ընկերությունները: Եղվարդում Գագիկ Խաչատրյանը ունի նաև ջերմոցներ: Այնտեղի աշխատողներից մեկը, պատմելով ջերմոցի մասին, նշում է, որ ամենուր տեղադրված են տեսախցիկներ, և իրենք չեն կարողանում նույնիսկ համտես անել իրենց աճեցրած բանջարեղենը:

Վերջերս էլ մամուլի ուշադրության կենտրոնում էր հայտնվել Ծաղկաձոր քաղաքում գտնվող մի դղյակ, որը դարձյալ կապվեց Գագիկ Խաչատրյանի անվան հետ: Ըստ հրապարակմանը` դղյակի առանձնահատկություններից մեկն այն է, որ տարածքում կառուցվել է ամեն ինչ` թենիսի կորտ, մանկական խաղահրապարակներ, լողավազան, ֆուտբոլի դաշտ: Իսկ լողավազանի վերաբերյալ լեգենդներ են պտտվում: Այն  կառուցված է այնպես, որ դրա պատերից մեկի դերը տարածքում եղած բնական ժայռն է ստանձնել:

Մամուլի հրապարակումների համաձայն` առանձնատունը գնահատվում է մոտ 3.5-4 միլիոն դոլար:

Գագիկ Խաչատրյանին է պատկանում նաև Հյուսիսային պողոտայում գտնվող ժամացույցների և ոսկյա զարդերի վաճառքով զբաղվող «Խրոնոգրաֆ» խանութը, որտեղ ժամացույցի գները անցնում են մի քանի միլիոն դրամը:

Ըստ մամուլի հրապարակումների՝ Գագիկ Խաչատրյանին է պատկանում նաև ինտերնետ մատակարարող Ucom ընկերությունը:

Hetq.am