Այսօր՝ հունիսի 26-ին արտակարգ դեպք է տեղի ունեցել Երևանում: Առավոտյան ժամը 8.20-ի սահմաններում Ոստիկանության Էրեբունու բաժին ահազանգ է ստացվել, որ Այվազովսկի 68 տանը ինքնասպան են եղել հայր ու որդի:

Նշված սեփական տան 3-րդ հարկի կիսակառույց շինության մեջ ամրանից մետաղյա ճոպանով կախվելու միջոցով ինքնասպան են եղել 62-ամյա Պետրոս Գալուստովը և նրա որդին՝ 30-ամյա Արթուր Գալուստյանը:

ֆոտոլրագրող Գագիկ Շամշյանը պատմել է, որ քննչական մարմինը հոր որովայնի մոտ հայտնաբերել էր նամակ, որն առգրավվել է քննիչի կողմից:

Հարևանները ֆոտոլրագրողին պատմել են, որ հայր ու որդի արհեստավորներ են: Նրանց  կախվելու վայրից կես մետր այն կողմ դրված է եղել երկու խաչ և սրբապատկեր:

Ավելի ուշ պարզվել է, որ որդին՝ Արտաշ Գալուստյանը մի քանի օր առաջ է ազատվել «Նուբարաշեն» քրեակատարողական հիմնարկից: Նա մեկ այլ անձի հետ 2011թ. նոյեմբերին Արշակունյաց պողոտայի վրա կայանված «Ինֆինիթի» մակնիշի ավտոմեքենայի ապակին կոտրելու միջոցով հափշտակել էր ավտոմեքենայում եղած առանձնապես խոշոր (56 մլն դրամ) գումար:

Նշված գումարը պատկանում էր «Մանանա Գրեյն» ՍՊԸ-ին, որը աշխատակիցը պետք է տեղափոխեր բանկ:

Նշված գողության փաստով Ոստիկանության քննչական գլխավոր վարչության Էրեբունու քննչական բաժնում հարուցվել է քրեկան գործ ՀՀ Քրօրի 177 հոդվածի 3-րդ մասի հատկանիշներով:

Գ. Շամշյանը հայտնում է, որ հաշվի առնելով դեպքի արտառոց բնույթը, դեպքի վայր է ժամանել նաև Էրեբունի-Նուբարաշեն վարչական շրջանների դատախազ Հովհաննես Սուքիասյանը:

…..

Այսօր ինքնասպան եղած Արթուր Գալուստյանը, պարզվում է, գործով անցնող մեկ այլ անձի հետ  2011թ. նոյեմբերին Արշակունյաց պողոտայի վրա կայանված  «Մանանա Գրեյն» ՍՊԸ-ի աշխատակցի «Ինֆինիթի» մակնիշի ավտոմեքենայի ապակին կոտրելու միջոցով հափշտակել է ավտոմեքենայում եղած առանձնապես խոշոր (56 մլն դրամ) գումարը,  որը աշխատակիցը պետք է տեղափոխեր բանկ:

Ապա ձերբակալվել է` մեղադրվելով 177 հոդվածով,  (գողություն) և, ինչպես տեղեկացրեց ՔԿՀ վարչության մամուլի ծառայության պետ, Գոռ —ը 2012 –ի մայիսի 24-ին կալանավորվել է: Նուբարաշեն ՔԿՀ-ում նա պահվել է մինչև հունիսի 21-ը, որից հետո, ոստիկանության լրատվական վարչության աշխատակից Արմեն Մալխասյանի փոխանցմամբ, վերահսկող դատախազի որոշմամբ փոփոխվել է`  Գալուստյանի խափանման միջոցը ընտրելով ստորագրություն չհեռանալու մասին:

Նրանից 56 միլիոն դրամ գողոնից խուզարկությամբ առգրավվել է 900 հազար դրամ և 3 հազար ԱՄՆ դոլար գումար: Մանրամասներն,  ըստ Մալխասյանի, նախաքննության շահերից ելնելով չեն հրապարակվում:

Նշենք, որ գողությունը ենթադրում է ոչ ծանր պատիժ, (մոտավորապես մինչև 3 տարի )եթե գողոնը վերադարձվում է:

Չի բացառվում, որ դատախազի որոշումը պայմանավորված է եղել զուտ օպերատիվ նպատակներով՝ երիտասարդին ազատության մեջ թողնել և, քայլերին հետևելով, գողացված գումարի չհայտնաբերված մասի վերաբերյալ տեղեկություններ ստանալ: Չի բացառվում նաև, որ Գալուստյանը իրավապահների խոստումների հետ կապված ինչ –ինչ հարցերում հուսախաբ է եղել, սակայն փաստ է, որ դատախազի որոշումը ողբերգական ավարտ ունեցավ. կալանավայրից դուրս գալուց ընդամենը 4 օր անց երիտասարդը ոչ միայն ինքնասպան եղավ, այլև նույն քայլին գնաց նաև նրա հայրը:

Իհարկե, այս գործում մութ հարցեր կան, հուսանք, որ նախաքննությունը կպարզաբանի դրանք: