Վարչապետ Տիգրան Սարգսյանի այն հարցին, թե արդյո՞ք շատ են Եվրադատարանում Հայաստանի դեմ հարուցված գործերը, ՀՀ արդարադատության նախարար Հրայր Թովմասյանը պատասխանեց, որ «Եհովայի վկա» կրոնական կազմակերպության բազմաթիվ անդամներ Եվրադատարանում Հայաստանի դեմ հայցեր են ներկայացրել:

Նշենք, որ «Եհովայի վկաները» հրաժարվում են ծառայել բանակում, ինչի հետևանքով ենթարկվում են քրեական պատասխանատվության: Այս պահին էլ, ըստ արդարադատության նախարարի տեղեկացման, քրեակատարողական հիմնարկներում Եհովայի վկաներ կան: Նրանց մի մասը Եվրոպայի մարդու իրավունքների դատարանում վիճարկում է իրեն կալանքի ենթարկելու որոշումները:

Հ. Թովմասյանի հայտարարեց, որ այդ կազմակերպության ներկայացուցիչների հետ ներկայում քննարկումներ են ընթանում: Բացի այդ` արդարադատության նախարարությունում ստեղծված է աշխատանքային խումբ, որն ուսումնասիրում է Եվրադատարանում Հայաստանի դեմ հարուցված գործերը, և փորձում է կանխարգելիչ միջոցառումներ մշակել: