Այսօր  արտակարգ պատահար է տեղի ունեցել Երևանում։ Ինչպես դեպքի վայրից Tert.am–ին հայտնել  է ֆոտոլրագրող Գագիկ Շամշյանը, Չարբախ թաղամասի Շարուրի 37 հասցեում գտնվող «Էլեկտրոն» գործարանում հրդեհ–պայթյուն է տեղի ունեցել, որի արդյունքում փլուզվել է շինությունը։ Շինության փլատակների տակից դուրս է բերվել և հիվանդանոց է տեղափոխվել մի հոգի, ևս մեկն այս պահին փնտրվում է։

Այս պահին դեպքի վայր է ժամանել ՀՀ Արտակարգ իրավիճակների նախարար Արմեն Երիցյանը՝ ԱԻՆ–ի ղեկավար կազմով և փորձագետներով։

Ժամանել են նաև Փրկարար ուժերի վարչության Երևանի մեծ թվով փրկարարներ՝ Երևանի Փրկարար ծառայության պետ Մուշեղ Ղազարյանի գլխավորությամբ։ Տեղում է նաև Փրկարար ծառայության օպերատիվ վարչության պետ Արման Ցոլակյանը։ Արդեն ժամանել են Երևանի Ճանապարհային ոստիկանության և Ոստիկանության Շենգավիթի բաժնի աշխատակիցները։ Ժամանել են նաև Ոստիկանության փորձաքրեագիտական կենտրոնի մեծ թվով փորձագետներ։

Պայթյունի վայրում Գ. Շամշյանին պատմել են, որ լսվել է պայթյունի 3 ուժեղ ձայն, որից հետո առաջացել է խոշոր հրդեհ։

Կան վարկածներ, որ տեղի ունեցածը դիտավորյալ պայթեցում է, սակայն դրա վերջնական պատասխանը կտրվի փորձաքննչական և փորձաքրեագիտական աշխատանքներից հետո։

Քիչ առաջ Գ. Շամշյանը հայտնեց, որ շինության փլատակների տակից մահացած վիճակում դուրս է բերվել մի տղամարդու դի, ով, պարզվել է 64-ամյա Ադիբեկ Բարսամյանն է։ Եվս մեկ հոգի՝ 67-ամյա Ջանիբեկ Մարտիրոսյանը, մարմնական վնասվածքներով տեղափոխվել է «Էրեբունի» բժշկական կենտրոն։

Քիչ առաջ հայտնի դարձավ,  որ «Էրեբունի» բժշկական կենտրոնում գիտակցության չգալով մահացել է նաև 67-ամյա Ջանիբեկ Մարտիրոսյանը։