ԱՄՆ-ի Պետքարտուղար Հիլարի Քլինթոնը ներկայացրել է աշխարհում մարդու իրավունքների ոլորտում տիրող իրավիճակի վերաբերյալ  2011թ ամենամյա զեկույցը:  Փաստաթուղթն անդրադարձել է նաև Հայաստանին:

Զեկույցում նշվում է, որ 2008թ Սերժ Սարգսյանը ընտրությունների արդյունքում դարձավ Հայաստանի նախագահ: Զեկույցի համաձայն՝ Հայաստանում մարդու իրավունքների հետ կապված ամենակարևոր խնդիրն առնչվում է քաղաքացիների` իշխանությունը փոխելու, խոսքի և մամուլի ազատության, ինչպես նաև դատական անկախ իշխանության իրավունքների սահմանափակմանը:

Զեկույցում նշված է, որ 2011թ ազատ են արձակվել 2008թ նախագահական ընտրություններին հաջորդած իրադարձությունների հետևանքով ձերբակալված 6 ընդդիմադիր գործիչներ: 2011թ. ապրիլի 28-ից սկսած երկրի իշխանությունն արտոնել է ցույցերի անցկացումը նախկինում արգելված վայրերում: Լրատվամիջոցներին և մասնավորապես հեռուստատեսությունների մասին բաժնում նշվում է, որ այս ոլորտը մնում է խոցելի օբյեկտիվ լրատվության մատուցման առումով: Կառավարությունը ապաքրեականացրել է զրպարտությունն ու վիրավորանքի մասին օրենքի դրույթը, սակայն սահմանել է նոր՝ ավելի բարձր վարչական տուգանքներ, որոնք լրագրողներին և լրատվամիջոցներին ստիպում են կիրառել ինքնագրաքննություն: Զեկույցի համաձայն թվային հեռուստատեսության անցման գործընթացը նպաստել է մեդիայի բազմակարծությանը:

Զեկույցը նաև մատնանշում է դատական համակարգում առկա բացթողումները, առանձնացնելով այն փաստը, որ գործադիր իշխանության համար դատարանները ծառայում են որպես քաղաքական ճնշման գործիք: «2011թ. ընթացքում բանակում գրանցվել են խաղաղ պայմաններում մի քանի կասկած հարուցող մահեր:

Զեկույցը շոշափում է նաև բանտերի գերբեռնվածության, հակասանիտարական պայմանների և բժշկական ծառայությունների բացակայության հարցերը: «Ոստիկանությունը ծեծի է ենթարկում քաղաքացիներին ձերբակալությունների և հարցաքննությունների ժամանակ: Իշխանությունները սահմանափակում են կրոնական ազատությունը: Երկրում շարունակում է տիրել կաշառակերությունը: Ընտանեկան բռնությունը մնում է հիմնական խնդիրներից մեկը: Թրաֆիքինգը նույնպես խնդրահարույց ոլորտ էր, սակայն իշխանությունները բազմաթիվ ջանքեր գործադրեցին դրա դեմ պայքարելու համար: Սեռական փոքրամասնությունները ենթարկվել են բազմաթիվ ճնշումների զինվորականների և բանտային պաշտոնյաների կողմից», — նշված է զեկույցում:
Պետդեպարտամենտի զեկույցի՝ Հայաստանին նվիրված հատվածի վերջում հեղինակները անդրադարձել են աշխատավորների իրավունքերի չարաշահումներին՝ նշելով, որ երկրում առկա աշխատանքային օրենքները հաճախ խախտվում են: