Տավուշի մարզի սահմանամերձ Չինարի և Մովսես գյուղերի գյուղապետերը Tert.am-ի հետ զրույցում հաստատել են այն լուրը, որ երեկ Տավուշի մարզի մի քանի գյուղերում գիշերն անհանգիստ է անցել, քանի որ ադրբեջանական կողմը մինչև գիշերվա ժամը երկուսը գնդակոծել է հայկական գյուղերը։

Երկու գյուղերի գյուղապետերը նաև տեղեկացրեցին, որ, բարեբախտաբար, երկու գյուղերում էլ զոհեր և վիրավորներ չկան:
Մովսես գյուղի գյուղապետ Լյուդվիգ Ապերյանը նշեց, որ գիշերային գնդակոծությունների պատճառով այսօր գյուղում հետաձգվել են Շուշիի ազատագրման 20-ամյակի և Մեծ հայրենական պատերազմում ֆաշիզմի նկատմամբ տարած հաղթանակի 67-ամյա տարեդարձի առիթով նախատեսված միջոցառումները:

«Ծրագիրը փոխեցինք, նախատեսված էր մեծ միջոցառում»,- ասաց Լյուդվիգ Ապերյանը: Գյուղապետը նշեց, որ ադրբեջանցիների կողմից Մովսես գյուղի տների, դպրոցների, մանկապարտեզների ուղղությամբ կրակոցները կրկնվում են շաբաթական երեք-չորս անգամ պարբերականությամբ կամ ինչպես գյուղապետը ձևակերպեց՝ «շաբաթը երեք-չորս օրը՝ պարտադիր ա»:

Լյուդվիգ Ապերյանի խոսքով՝ գյուղի չափահաս և ավագ տարիքի բնակչությունը տարիների ընթացքում սովորել է ապրել մշտական գնդակոծության տակ, սակայն երեխաները վախենում են:

«Դպրոցականները վախենում են, դե փոքր էրեխեք են. մի քանի օր առաջ, դասերը վերջացրած՝ ժամը երկուսն էր, էրեխեքին խփեցին էնտեղ, որտեղ կանգնած էին (նկատի ունի կրակեցին նրանց ուղղությամբ — Tert.am )»,-ասաց գյուղապետը, ով հավելեց, որ անցած գիշերվա կրակոցներն ամենաուժգինն էին ու տևողությամբ ամենաերկարը՝ հրադադարի ռեժիմի հաստատումից հետո:

Հիշեցնենք, որ Տավուշի մարզի Մովսես և Չինարի գյուղերը գտնվում են հայ-ադրբեջանական սահմանից ուղիղ գծով՝ շուրջ 300-500 մետր հեռավորության վրա և մշտապես հակառակորդի նշանառության տակ են:

Չինար գյուղի գյուղապետ Սամվել Սաղոյանն էլ նշեց, որ իրենց գյուղում կրակոցները «ամենօրյա բնույթ են կրում», սակայն ի տարբերություն Մովսես գյուղի, այսօր տոնի առիթով նախատեսված միջոցառումները Չինարում չեն հետաձգվել:

Նախկին ազատամարտիկ Սամվել Սաղոյանն ասում է, որ սովորաբար մայիսի 9-ին ադրբեջանցիները ակտիվացնում են գյուղի գնդակոծությունները, այս կերպ փորձելով վրեժ լուծել Շուշիի ազատագրման հերթական տարեդարձի կապակցությամբ տոնակատարություններ իրականացնող հայությունից՝ Հայաստանում ու Արցախում:

Ինչպես հաղորդում է Razm.info-ն, երեկ գիշեր ուժեղ գնդակոծություններ են եղել նաև մարզի Ներքին Կարմիրաղբյուր գյուղի ուղղությամբ:

Այգեպարի գյուղապետ Անդրանիկ Այդինյանը նշեց, որ ինքը տեղյակ չէ երեկվա դեպքերից, քանի որ գիշերը գյուղում չի եղել, այլ՝ Վանաձոր քաղաքում:

Սակայն վերջինս նաև հավելեց, որ ադրբեջանցիները շատ հաճախ են կրակում Այգեպար գյուղի ուղղությամբ: «Ո~նց ուզում են՝ կրակում են, էլի, մեկ էլ տեսնում ես՝ գիշերը սկսեցին՝ անկապ- անկապ»: