ՀԱԿ-ը դիմում է  Սահմանադրական դատարան` ընտրությունների արդյունքները չեղյալ հայտարարելու պահանջով:  Ազատության հրապարակում Հայ ազգային կոնգրեսի հանրահավաքում այսօր հայտարարել է ՀՀՇ վարչության նախագահ Արամ Մանուկյանը:

Առաջիկայում հայցադիմումը պատրաստ կլինի.«1.Սերժ Սարգսյանի, վարչապետի, տարբեր պետական պաշտոնյաների, գյուղապետերի կողմից քարոզարշավին մասնակցելու փաստը: Ունենք տվյալներ, որ գյուղապետերը գումար են բաժանել իրենց սենյակներում:

2.Ցուցակների ուռճացված լինելու փաստը: Մենք պահանջում էինք, որ մաքրեն ցուցակները, 500-700 հազար մարդ ավելի է գրանցված եղել:

3.Պահանջելու ենք հրապարակել ընտրողների ցուցակները:

4.Թանաքների խնդիրը: Մի կերպ հասանք, որ կնիքներ լինեն, որոնք կցնդեն 12 ժամից, բայց առավոտյան, ամենաշատ ակտիվության պահին, երբ քվեարկել է մոտ 400 հազար մարդ, քվեարկել է այս կնիքներով, ապա օգտագործել են այս մարդկանց այլ տեղամասերում:

5.Վստահված անձանց նկատմամբ բռնություններ, ծեծ, ուղղորդում, ընտրակաշառքներ»:

Ըստ Մալաթիա — Սեբաստիան ընդգրկող թիվ 7 ընտրատարածքում առաջադրված և Կոնգրեսի համամասնական ցուցակի 7-րդ համար Նիկոլ Փաշինյանի՝ մայիսի 6-ին Հայաստանում անցկացված համապետական ընտրությունները դարձան մի նոր ապրիլի 24՝ որպես ՀՀ քաղաքացու ցեղասպանության օր:

«Մայիսի 6-ին ՀՀ իշխանությունների կողմից իրականացված ցեղասպանությունը կոնկրետ ապացույց ստացավ և քաղաքացու ինստիտուտը Հայաստանում ոչնչացնելու հարցում սերժանտական իշխանությունը «տպավորիչ» հաջողություններ է գրանցում»,– հայտարարեց նա, հղում կատարելով ՄԱԿ-ի կոնվենցիային. «Ցեղասպանություն է համարվում խմբի համար այնպիսի կենսապայմանների ստեղծումը, որոնց նպատակը նրա՝ խմբի, լիակատար կամ մասնակի ոչնչացումն է»:

«Հպարտ քաղաքացիներ, մենք այսօր չենք հավաքվել կոտորածի թեմայով ողբ անելու»,-հայտարարեց Նիկոլ Փաշինյանը՝ հպարտությամբ նշելով, որ մայիսի 7-ին իր վստահված անձինք թիվ 7 ընտրատեղամասը լքել են հպարտության զգացումով, քանի որ 9099 քաղաքացիներ են գտնվել, որոնք այս պայմաններում իրենց ձայները տվել են Նիկոլ Փաշինյանին և «պարտիզանական կռիվ տվել»:  Նիկոլ Փաշինյանը նկատեց ՝ «պետք է տեսնեիք լֆիկական օսվենցիմի կատարածուների դեմքերը քվերաթերթրկները հաշվելիս, երբ տեսնում էին, որ քվեարկել են Կոնգրեսի օգտին»:

Խոսք եղավ նաև ընթացիկ քաղաքական իրավիճակից: «Հայ ազգային կոնգրեսի խմբակցությունը պետք է գնա խորհրդարան և այնտեղ կռիվ տա»,– համոզված է Փաշինյանը:

Ըստ կոնգրեսի՝ ՀՀ բոլոր ընտրատեղամասերում համատարած քվեարկել են ՀՀ-ից բացակայողները, արտագաղթածները,  հիմնական մեքենայությունները կատարվել են մարզերում: Մասնավորապես՝ Գեղարքունիք, Սյունիք, Վայոց Ձոր, որտեղ առանձին տեղամասերում գրանցվել է 91, 97, 98. տոկոս մասնակցություն, Տաշիրում և Վայքում՝ 100: