Այսօր Բնապահպանության նախարարության աշխատակազմի բնապահպանական պետական տեսչության ավագ պետական տեսուչ Արթուր Բեգլարյանը լրագրողներին տեղեկացրեց, որ տարվա ընթացքում արձանագրվել է ապօրինի որսի եւ ձկնորսության մոտ 200 խախտում, հարուցվել է 4 քրեական գործ, որպես տույժ, տուգանք եւ բնությանը պատճառված վնասի հատուցում պետբյուջե է մտել 17 մլն դրամ: Ասաց, որ այս տարի ավելի շատ խախտումներ հայտնաբերվել են մինչեւ որսաշրջանի բացումը:

Ասուլիսի մյուս բանախոսը` Հայ որսորդների ազգային դաշինքի նախագահ Գրիգոր Գրիգորյանը, նշեց, որ Հայաստանում որսի սեզոնը բացվել է օգոստոսի 27-ին եւ կփակվի փետրվարի 29-ին: Այն ունի երկու փուլ: Առաջին փուլն անցել է նորմալ, առանց միջադեպերի, «Որսորդները` գոհ, մենք` գոհ»,- ասաց Գրիգորյանը: Երկրորդ շրջանում որսվող և թռչունները, և կենդանիները փոխվել են, այժմ կաքավի, նապաստակի որսի սեզոնն է:

Բազմաթիվ խնդիրներ ունի բնապահպանության նախարարության այս ոլորտը որոնցից միայն մեկը`ու ամենաանմեղը  ներկայացվեց.«Հայտնի չէ, թե որ կենդանուց քանի հատ կա Հայաստանում»,- ասաց Արթուր Բեգլարյանը նշելով, որ չնայած, օրենքով նախատեսված է, որ 5 տարին մեկ դրանք հաշվարկվեն, բայց 21 տարի է`ինչ  հաշվարկ չի կատարվել, քանի որ բյուջեից գումար չի հատկացվել:

Պատկերացնել կարելի է, թե այդ դեպքում ինչ տրամաբանությամբ կարելի է դուրս գալ որսի ու ինչեր անել:

Ասենք կան առանձին կենդանիներ որսալու լիցենզիաներ, որոնք վաճառվում են որսորդներին, օրինակ` այս տարի կա 10 վարազի թույլտվություն. Իսկ ով կարող է ասել թե քանի վարազ են որսում, եթե չկա հաշվարկ: Կրկնապատկվել են նաեւ պատճառված վնասների համար տուգանքները` 100 հազարից մինչեւ 250 հազար դրամ: Ամենաթանկը`  հայկական մուֆկլոնի, հովազի, բեզոարյան այծի դեպքում է` 3 մլն դրամ: Իսկ թե կոռուպցիան ինչ աստիճանի կարող է հասնել այս պարագայում, այլ խոսակցության թեմա է: