Անցյալ տարվա հունիսի 3-ին ՄԱԿ Գլխավոր Վեհաժողովի կողմից ընդունված հռչակագրով հոկտեմբերի 20-ը հռչակվեց Վիճակագրության համաշխարհային օր` ի նշան ողջ աշխարհում վիճակագրության կարևորության ճանաչման, որը նշվում է «Ծառայություն, արհեստավարժություն և բարեխղճություն» կարգախոսի ներքո: «Վիճակագրությունը հիմք Է ծառայում ձեռնարկչական և հասարակական գործունեության ոլորտում կառավարական շատ որոշումների համար և տեղեկատվություն է տալիս այն միտումների և ուժերի մասին, որոնք ազդում են մեր կյանքի վրա»,- ասված էր օրվա առթիվ ՄԱԿ-ի տարածած ուղերձում:
Նշենք որ, 1947 թվականին ՄԱԿ–ի կողմից հիմնադրված առաջին հանձնաժողովներից մեկը դարձավ վիճակագրության հանձնաժողովը, որը ստեղծվեց և վճռորոշ դերակատարում ստանձնեց համաշխարհային մասշտաբով գլոբալ վիճակագրության կազմակերպման գործում: Անկախության առաջին տարիներից սկսած Հայաստանը ևս ձեռնամուխ եղավ միջազգային վիճակագրական հանրությանն ինտեգրվելու գործընթացին: Իսկ այս օրերին մեր երկրում ընթացող մարդահամարը ասվածի լավագույն ապացույցներից մեկը կարող է դիտվել: