Ֆրանսիայի նախագահ Նիկոլա Սարկոզիի Երևանում Հայոց ցեղասպանության վերաբերյալ արած հայտարարությունները Անկարան շատ ծանր է տանում:
Թուրքական «Անադոլու» գործակալությունը, cւ խոսքը փոխանցելով նշում է, որ Թուրքիայի արտաքին քաղաքական գերատեսչության ղեկավարը Նիկոլա Սարկոզին կոշտ քննադատության ենթարկելով խորհուրդ է տվել Թուրքիային սեփական անցյալի հետ առերեսման խորհուրդներ տալուց առաջ, նախ հայելու մեջ նայել:
Դավութօղլուն սպառնացել է թե` Ֆրանսիայի նախագահի հայտարարությունները բացասաբար են անդրադառնալու Հայաստանի և Թուրքիայի միջև հարաբերությունների կարգավորման գործընթացի վրա, որը, չնայած որոշ թերությունների, այնուամենայնիվ, շարունակվում է:
«Այն երկրները, որոնք անցյալում իրականացրել են գաղութատիրական քաղաքականություն, որոնց իշխանությունները մշտապես իրենց հեռու են պահել հասարակությունից` իրենց քաղաքացուն ընկալելով որպես ստորին դասի ներկայացուցիչ, Թուրքիային իր պատմության հետ առերեսման խորհուրդներ տալու իրավունք չունեն։ Եվ հենց նրանք, նախ և առաջ, պետք է հաշվի նստեն իրենց սեփական անցյալի հետ»,– ասել է Դավութօղլուն:
Նա նշել է, որ Ֆրանսիայի այդ քայլը կնպաստի աշխարհում խաղաղության հաստատմանը. «Մենք առերեսվում ենք մեր պատմության և անցյալի հետ, այդ հարցում որևէ խնդիր չունենք։ Մեր պատմության ընթացքում հայերն ու թուրքերը դարերով գոյակցել են, ապրել նույն քաղաքներում, նույն թաղամասներում, կիսել նույն մշակույթը։ Ասելով թուրքական ճարտարապետություն՝ մենք նկատի ունենանք նաև այդ ճարտարապետության մեջ մեր հայ եղբայրների թողած ավանդը»:
Ինչ վերաբերվում է Ցեղասպանությանը Թուրքիայի արտգործնախարարը կարծում է. «Մենք միշտ առերեսվում ենք սեփական պատմության հետ։ Այդ հարցում մեր դիրքորոշումը հստակ է։ Հայտարարել ենք, որ 1915թ. ցավը մեր բոլորինս է։ Այդ հարցում անհանգստանալու ոչինչ չունենք։ Սակայն Թուրքիային սեփական անցյալի հետ առերեսման խորհուրդներ տվողները լավ կլինի՝ նախ նայեն հայելու մեջ»: