Կարեն Կարապետյանի պաշտոնանկությունը բավական հետաքրքիր հարցեր է առաջացրել Սերժ Սարգսյանի և ռուսաստանցի խոշոր գործարար «Տաշիր» գրուպի հիմնադիր Սամվել Կարապետյանի փոխհարաբերությունների վերաբերյալ:

Սակայն մեր ունեցած տվյալներով խնդիրը, որից էլ «առաջացել» է հրաժարականը, վերաբերվում է, ոչ թե Կարեն Կարապետյանին, այլ նրա միլիարդատեր եղբորը` Սամվել Կարապետյանին, որի ֆինանսական ազդեցությամբ է Կարեն Կարապետյանը Հայաստանի իշխող համակարգում դարձել ազդեցիկ դեմք:

Սերժ Սարգսյանի նախագահ դառնալուց հետո, Սամվել Կարապետյանը բավականին լուրջ տեղ է զբաղեցնում առաջնայինների ցուցակում: Նույնիսկ այնքան, որ համարվել է երկրի ֆինանսական հենասյուներից մեկը, իր համապատասխան արտոնություններով: Ընդհուպ իր եղբորը վարչապետի պաշտոնում տեսնելու ակնկալիքը:

Գաղտնիք չէ, որ նրան է պատկանում մայրաքաղաքի կենտրոնի մի հսկա հատված. Մալիբու սրճարանի հարակից տարածքը,(որը կարծես չեն շտապում կարգի բերել) և նախկին Սևան հյուրանոցի ու արդարադատության նախարարության նախկին այրված շենքը, որը գործարարը չի գնել, այլ փոխանակել է, տարածքի դիմաց նա բարձրահարկ շենք է կառուցում վերնիսաժի հատվածում: Մի շարք գերատեսչություններ այնտեղ տեղափոխելու խոստում են ստացել, որն արդեն քանի տարի է, այդպես էլ իրականություն չի դառնում:

Կապ ունի՞ այս ամենը նախագահի աշխատակազմի ղեկավարի հրաժարականի հետ, առայժմ պարզ չէ, շատ հնարավոր է, որ երկար ժամանակ ունենալով քաղաքական հավակնություններ,( ասում են, որ հստակ խոստում ու պայմանավորվածություն է եղել վարչապետի աթոռը Կարեն Կարապետյանին փոխանցելու շուրջ): Ի վերջո Սամվել Կարապետյանն Սերժ Սարգսյանի հետ եկել է փոխհամաձայնության` քաղաքական հավակնություններից հրաժարվելու դիմաց ստանալով բիզնես երաշխիքներ:Սակայն չի բացառվում, որ սա նշանակում է խզում, որից հետո հայտնի գործարարը կամաց – կամաց «պոչը կքաշի» Հայաստանից: