Այսօր Վճռաբեկ դատարանի առջև հավաքվել էին մի քանի տասնյակ փաստաբաններ` «Առանց «դաբրոների» արդարադատություն», «Մեր պահանջը իրական արդարադատություն», «Ոչ արդարադատության դահիճներին» պաստառներով: Նրանք պահանջում են, որ դատավորները կայացնեն արդար վճիռներ և կայացնելուց հետո չպատժվեն:

Իսկ հավաքվելու առիթն Ալբերտ Խաչատրյանի քրեական գործն էր: Երևանի քաղաքի Ավան և Նոր Նորք վարչական շրջանների ընդհանուր իրավասության դատարանի դատավոր Սամվել Մնացականյանը նրան գրավի դիմաց բաց է թողել, չնայած մինչ այդ նրա նկատմամբ որպես խափանման միջոց էր ընտրել կալանավորումը:

Հունիսի 24-ին ՀՀ Արդարադատության խորհուրդը դիմել է Սերժ Սարգսյանին, որպեսզի դատավորի լիազորությունները դադարեցվեն, քանի որ նա չէր պատճառաբանել գրավով նրա ազատ արձակումը:

Մեզ հետ զրույցում փաստաբանների պալատի նախագահ Ռուբեն Սահակյանը նշեց, որ ուսումնասիրել է այս գործը և պարզել, որ դատավոր Սամվել Մնացականյանը չէր պատճառաբանել նաև անձի նկատմամբ խափանման միջոց կալանք կիրառելու իր որոշումը: «Խնդիրն այն է, որ այդ որոշումը չպատճառաբանելու համար նա չի պատժվում, իսկ խափանման միջոց` գրավ կիրառելը դատապարտվում է Վճռաբեկ դատարանի նախագահի , Արդարադատության խորհրդի կարգապահական հանձնաժողովի և մյուս անդամների կողմից»,- ասաց Ռուբեն Սահակյանը` հավելելով. «Մենք միայն արդարություն ենք պահանջում: Ես համոզված եմ, որ այս ամենը կտա իր արդյունքները, եթե ոչ այսօր կամ վաղը, բայց այս տարվա ընթացքում»:

Ռուբեն Սահակյանը տեղեկացրեց, որ այսօրվա բողոքի ակցիային մասնակցել են նաև նախկին դատավորներ, նախկին քննիչներ, որոնք հիմա փաստաբան են:

Ալբերտ Խաչատրյանի պաշտպան Գայանե Սարգսյանն էլ պնդեց, որ իր պաշտպանյալը անմեղ է, և քրեական գործը պետք է կարճվի:
Ալբերտ Խաչատրյանին մեղադրանք է առաջադրվել 175 հոդվածի 2-րդ կետի 3-րդ և 4-րդ մասերով` ավազակային հարձակմամբ բնակարան մուտք գործելը` զենքի գործադրմամբ:
«Տղան անմեղ է, քանի որ մինչև իր Հայաստան վերադառնալը և «Նուբարաշեն» քրեակատարողական հիմնարկում գտնվելը դեռ հանցագործությունները շարունակվում էին»,- ասաց պաշտպանը: