Այսօր Հայաստանի արտգործնախարար Էդվարդ Նալբանդյանը հանդիպել է պաշտոնական այցով Երևանում գտնվող Շվեդիայի ԱԳ նախարար Կառլ Բիլդտին:

Նալբանդյանը ողջունել է հյուրին և ընդգծել, որ Հայաստանը մեծապես կարևորում է սկանդինավյան տարածաշրջանի, հատկապես՝ Շվեդիայի հետ փոխշահավետ համագործակցության համակողմանի շարունակական զարգացումը, նաև վստահություն է հայտնել, որ իր գործընկերոջ այցելությունը նոր լիցք կհաղորդի երկու երկրների միջև փոխգործակցության ընդլայնմանը և խորացմանը:

Շվեդիայի ԱԳ նախարարը շնորհակալություն է հայտնել ջերմ ընդունելության համար և նույնպես ընդգծել է, որ Շվեդիան վերջին տարիներին ակտիվ ջանքեր է գործադրում Հայաստանի և հարավկովկասյան տարածաշրջանի հետ հարաբերությունները զարգացնելու ուղղությամբ:

Նախարարներն անդրադարձել են երկու երկրների միջև իրավապայմանագրային դաշտի ընդլայնմանը, միջխորհրդարանական, առևտրատնտեսական, կրթական, մշակութային համագործակցության զարգացմանը, ապակենտրոնացված մակարդակով հարաբերությունների հաստատմանը, գործարար կապերի խթանման նպատակով ձեռնարկվելիք քայլերին: Երկուստեք նշվել է, որ վերջին տարիներին բարձր մակարդակի փոխադարձ այցելությունները, բազմաթիվ հանդիպումները միջազգային հարթակներում՝ երկկողմ կապերին նոր լիցք հաղորդելու պատրաստակամության վկայությունն են:
Զրույցի ընթացքում անդրադարձ է եղել Հայաստան — Եվրոպական միություն հարաբերություններին, մանրամասն քննարկվել է «Արևելյան գործընկերություն» ծրագրի իրականացման ընթացքը, որի գլխավոր նախաձեռնողներից է Շվեդիան: Մասնավորապես քննարկվել են ասոցացման համաձայնագրի շուրջ ընթացող բանակցությունները, մուտքի արտոնագրային ռեժիմի դյուրացման, ազատ և համապարփակ առևտրի գոտու ստեղծման բանակցությունների մեկնարկի նախապատրաստական աշխատանքները:

Մտքեր են փոխանակվել արցախյան հիմնահարցի բանակցային գործընթացի շուրջ, վերահաստատել են, որ հիմնախնդրի խաղաղ կարգավորումն այլընտրանք չունի: Այս ենթատեքստում Էդվարդ Նալբանդյանը ներկայացրել է բանակցային գործընթացի վերջին զարգացումները՝ Կազանում կայանալիք գագաթաժողովին ընդառաջ: