Մայիսի 30-ին «Ճանաչիր քո երկիրըե երիտասարդական նախաձեռնությունն ահազանգել էր «Խոսրովի անտառ» պետական արգելոցի տարածքում գտնվող Հավուց Թառի վանական համալիրի (X դար), Աղջոց վանքի (XIII դար) և Կաքավաբերդ ամրոցի (IX դար) ուխտավորներից գումար գանձելու փաստի մասին:

Ըստ նախաձեռնության հաղորդագրության, բարձրացված հարցի վերաբերյալ մամուլում պարզաբանումներով է հանդես եկել «Խոսրովի անտառ» պետական արգելոցի տնօրեն Վորոնցով Բարսեղյանը, որի հայտարարությունները, սակայն, ոչ միայն չեն վերացրել «Ճանաչիր քո երկիր»-ի հարցադրումների շուրջ մտահոգությունները, այլև առաջ են բերել նոր հարցեր:

«Այսօր եթե եկեղեցի ես գնում` չե±ս վճարում: Մայր Աթոռ ես գնում` 1000 դրամ վճարում ես, ինչու± այս կոթողները այցելելու համար չպետք է վճարել»,- դեմքի լուրջ արտահայտությամբ հայտարարել է Վորոնցով Բարսեղյանը, առանց մանրամասնելու, թե Մայր Աթոռի կոնկրետ ո±ր հատվածում են իրենից պահանջում վճարել 1000 դրամ:

Վ.Բարսեղյանը հայտարարել է նաև, որ Խոսրովի արգելոցի տարածքում գտնվող եկեղեցիները, ինչպես Հավուց Թառը կամ Աղջոց վանքը, Հայ առաքելական եկեղեցում գրանցված չեն և գտնվում են արգելոցի տնօրինության ներքո: Փաստացի, այս խոսքերի տրամաբանությունը հետևյալն է. մենք ենք տնօրինում սրբատեղիները, ինչ կուզենք կանենք: Միևնույն ժամանակ Բարսեղյանը չի մեկնաբանել, թե ուխտավորի համար ի±նչ նշանակություն ունի սրբատեղիի իրավական կարգավիճակը:

«Ճանաչիր քո երկիրը» երիտասարդական նախաձեռնությունը դիտարկում է Խոսրովի անտառի տնօրենի հայտարարությունները որպես արգելոցի վարած ապազգային քաղաքականության արդարացման փորձ և Հայ Առաքելական եկեղեցու հնագույն կոթողների` հայերի կողմից ճանաչմանն ուղղված խոչընդոտ:

Նախաձեռնությունը ևս մեկ անգամ կոչ է անում Ամենայն Հայոց Գարեգին Բ Կաթողիկոսին, մշակույթի նախարար Հասմիկ Պողոսյանին և բնապահպանության նախարար Արամ Հարությունյանին ձեռնարկել համապատասխան միջոցներ: