Երեկ «That place» ակումբում երաժիշտ, արվեստագետ և հասարակական ակտիվիստ Ծոմակը «Պինցետ» նախագծի հետ համատեղ ներկայացրեց իր նոր` «Որովհետև ես ուզում եմ» ձայնասկավառակը: Նախագիծը ֆինանսավորում են «Ուտոպիանա» հայ-շվեյցարական մշակութա-ստեղծագործական կազմակերպությունը, «Deem Communication» պրոդյուսերական կենտրոնը և «That place» ակումբը:

Ծոմակ Օգանեզովա, ավելի հայտնի՝ որպես Ծոմակ Օգա, նախկինում առաջին աղջիկների փանկ-ռոք «Ինցեստ» խմբի գաղափարական ու գործնական հիմնադիր, ինքն ասում է՝ Սոնա Աբգարյանի հետ միասին, Սոնան խմբի երգերի մեծ մասի բառերի հեղինակն է:
«Ես ուզում եմ դառնալ պրեզիդենտ» երգը, որն ամենահիթայինն էր «Ինցեստի» երգացանկում, իր բովանդակությամբ հեղափոխական է՝ ըմբոստ աղջիկների ֆեմինիստական ու հասարակական-քաղացիական պահանջը:

Ես ուզում եմ դառնալ պրեզիդենտ
Ես ուզում եմ սահմանները բացել
Ես ուզում եմ տանկերը պայթեցնել
Ես ուզում եմ ամեն ինչ փոխել:

«Ինցեստ»-ը գոյություն է ունեցել 5 տարի, 1999-2004: Այդ տարիներին բավականին հայտնի էր, թողարկել են ձայնասկավառակ, ըմբոստ երիտասարդությունը սիրում էր աղջիկների ընբոստ երգերը: Աղջիկները՝ Նառա, Ծոմակ, Նատա, Արմինե ոմանք ամուսնացան, ոմանք շարունակեցին երգել, ոմանք էլ՝ ոչ: Բայց խումբն այդ կազմով այլևս հանդես չի եկել 2004 թվականից: Ծոմակը մենակ էր ստեղծագործում, խմբի փլուզումը նրան այլընտրանքային տարբերակներ բերեց, նա սկսեց գրել էլեկտրոնային երաժշտություն, որից հետո թողարկեց ձայնասկավառակ:

«Պինցետ»-ը ստեղծվեց 2008-ին, սկզբում Աստղիկ Մելքոնյանի հետ(հարվածային գործիքներ), հետո ավելացավ Ժենյան՝ Եվգենիա Ասատրյան(ստեղնաշարային գործիքներ): Այսօրվա խմբի կազմը նույնն է, քիչ փոփոխությամբ՝ խումբ վերադարձավ «Ինցեստ»-ի հարվածորդ Արմինե Ղազարյանը(Nyusk), ով փոխարինեց Աստղիկին:
Այս խմբի հաջողությունները, հատկապես Ծոմակի, ինձ ուրախացնում են ոչ միայն իրենց երաժշտական արժեքով, ավելի շատ ես ուրախ եմ, որ ակտիվ քաղաքացին, հասարակական գործիչը, ով ներկա է համարյա բոլոր քաղաքացիական-հասարակական նախաձեռնություններում, ով ակտիվ պայքարում է ֆեմինիստական արժեքների համար, բոլոր մարդկանց, անկախ ամեն ինչից, հավասար իրավունքների ու արդարության համար՝ երաժիշտ ու արվեստագետ է:

Լուսինե Վայաչյան