Մեր թերթում տպագրված «Ֆիլիպինցին քթից բռնած ման է տալիս բոլորին» հոդվածին արձագանքել են ընթերցողները։ Քանի որ այն ավելի ամբողջական է ներկայացնում հոդվածի հերոսին, ստորև ներկայացնում ենք նաև այդ պատմությունը.

4 ամիս առաջ Թումանյան փողոցում ուշադրությունս գրավեց « Police, police» բղավող տարօրինակ գլխարկով արտասահմանցին: Վերջինս նկատելով իմ հայացքը, վազելով մոտեցավ ու պատմեց, որ իրեն անպատվել են նույն փողոցում գտնվող «Գուրման» սուպերմարկետում: Արտասահմանցին ասաց, որ ինքը ֆիլիպինցի է, և ընդամենը ցանկանում էր բրինձ գնել վերոնշյալ խանութից, սակայն այնտեղ նրան խնդրել էին նախ` մոտը եղած գումարը ցույց տալ, և դրանից հետո միայն ինչ-որ բան պահանջել: Խանութի աշխատողի նման քայլը խիստ վիրավորել էր նրան, ուստի ինձ խնդրեց աշխատակցին բացատրել, որ նման վերաբերմունքն անթույլատրելի է:

Ինձ նույնպես դուր չեկավ, որ Երևանի կենտրոնում գտնվող բավականին հայտնի սուպերմարկետում նման կերպ են սպասարկում արտասահմանցի հաճախորդներին: Վրդովված ու անդադար բղավող ֆիլիպինցու ուղեկցությամբ, ես գնացի «Գուրման» սուպերմարկետ ու խնդրեցի բրինձ վաճառող կնոջը բացատրություններ տալ:

«Աղջիկ ջան, օրական հազար նման բոմժեր են մտնում, բա չհարցնե՞մ, փող ունի, թե` չէ: Համ էլ սա գիժա: Գործ չունես դրա հետ»,- պատասխանեց վաճառողուհին:

Նման պատասխանից խիստ բարկացա, սակայն ֆիլիպինցուն փորձեցի բացատրել, որ կինը իրեն չի ցանկացել վիրավորել: Պարզապես չէի ցանկանում, որ արտասահմանցու մոտ վատ կարծիք ձևավորվեր Երևանի ու հայերի մասին:

Դեռ բղավող ֆիլիպինցուն մի կերպ դուրս բերեցի խանութից ու ասացի, որ բրինձ կարող է ուրիշ խանութից գնել: Նա էլ խնդրեց, որ ուղեկցեմ իրեն: Ճանապարհին պատմեց, թե շատ կարևոր գործ ունի Հայաստանում:

«Ես հայերին շատ եմ սիրում, բոլոր հայերը շատ հյուրասեր են, բացի այդ վաճառողուհուց»,- կրկին ամբողջ փողոցով մեկ բղավեց ֆիլիպինցին:

Ես նրան տարա մոտակա խանութ ու հաջողություն մաղթելով թողեցի այնտեղ: Այդ խանութի աշխատակիցներն ինձ հաջորդ օրը պատմեցին, որ ֆիլիպինցին ինչ-որ մանրունքից դարձյալ սարսափելի աղմուկ է բարձրացրել ու շարունակ պահանջել, որ ոստիկանություն կանչեն, քանի որ իրեն վիրավորել ու կողոպտել են:

Էլեոնորա Ասատրյան